by Lalramenga Hmar
1. Football khawvel piah lamah pawh hna a lo thawk ve tawh. Football khelh a chawlhsan hnuah Glasgow-ah mistiri ang reng deuhvin, dawr nghaktu ni pah fawmin hna a thawk phawt a, chumi hnuah Pub a siam leh a, "Fergie's" a ti ve ngat! A pub-a bar chu a football khelh laia miin 'mi nghawk ching' an tih hriat reng nan, "Elbow Room" a ti deuh ngat bawk!
2. Sir Alex-a hi America President lar ber zinga mi John F. Kennedy ngaisangtu a ni a. A thianpa Gordon Brown chuan JFK thah a nih chanchin vel awmna CD 35 lai a pe hial. JFK an thaha a taksa awmdan an enchianna (autopsy) report pawh a nei thlap a, a khum bulah a dah nghe nghe!
3. Liverpool player leh coach ropui ni ta, amah aia naupang zawk Kenny Dalglish chu a car-ah a phur thin. Ferguson-a hi Rangers-a a khelh tawh hnuin Dalglish hian Rangers tana khelh ve a duh a, a trial tur chu a car-in a hruai thin a ni awm e. Dalglish chuan, "Fergie hian car lianpui a nei thin a, min phur fo thin" a ti. A hnuah Dalglish hi Rangers hmelma Celtic-ah a khel a, Alex-a nen hian an inchang ta fo a ni.
4. Britain-a political party lar, Labour Party ruh tak a ni a, chuvangin Tony Blair pawh kha thurawn a pe ve fo. "I mi mamawhte room khata i khung khawm theih chhung chuan i chhe lovang," tiin a lo fuih tawh a ni.
5. Kum 26 chhung Manchester United manager a ni a, a ni rei viau mai. Mahse manager ni rei ber a ni lo. Europe-a Football Club manager ni rei ber chu Guy Roux niin, French club Auxerre chu kum 44 lai a lo enkawl a, kum 2005 khan a lo bansan ve chauh a ni! Scottish manager zingah pawh manager ni rei ber a ni chuang lova, kum 1897 atanga 1940 chhung khan Willie Maley chuan Celtic chu kum 43 zet a lo enkawl tawh a ni.
6. Pal leh bang zuankhum zuk zuk a ching! Galsgow mirethei veng atanga zi chhuak a ni a, football khelh mai loh chu tih tur vak an nei lova, mi pal leh bang zuankhum an uar hle. "Kan naupan lai chuan pal zuankhum hi kan inelna a ni," a ti.
7. 1999 khan Champions League final-ah Bayern Munich an hneh a. An hnehna goal hi hun tawp hnu, hun pek belh second 79-naa an khung a ni a, khami ni atang khan second 79 hi "Fergie Time" an ti a. Mi thenkhat chuan British referee-te hian Manchester United chu an chak theih nan hun an pek belh rei thei niin an sawi a, hun pek belh hi "Fergie Time" ti an awm bawk.
8. Mi tam tak, football lama inhmang tak tak pawhin, "Sir Alex" ti lovin, "Sir Alec" an ti fo. A chhan chu Scottish a nih avangin "Alec" hi a dik an ring a ni. Thenkhat chuan Alex leh Alec hi an hman pawlh mai mai bawk. England leh Scotland-ah "Alec" tih hi hmingah a lar hle a, a bik takin hmar lam ramriah a lar zual a ni.
9. Thelret (Chewing gum) a thial kan hmu fo a, internet-a chanchin nuihzatthlak leh awihawm loh tarlanna, 'Newsbiscuit' chuan, 'Sir Alex-a thelret thial nat zawng hian Linconshire (khua) chu electric eng a pe thei ang' an ti hial!
Sir Alex hian football match vawikhat chhung hian thelret hi 10 vel a thial thin a, chuti a nih chuan Manchester United a enkawl chhung kum 26 chhunga a thelret thial zawng zawng hi pawtfan ta ila, Old Trafford field khu vawihnih a hual chhuak thei ang an ti!
10. Cheshire khuaa Wilmslow venga a in chu "Fairfields" tiin a hming a vuah a. Fairfields hi a pa hnathawhna thin, lawng chawlhna hmun a ni.#
0 comments:
Post a Comment