Sam 3:4-5

by: Tv. Lalthanglawta (Alawta) Chawlhmun Dt. 2.12.2015

‘Chhakna ni lo, thil tih theihna pawh ni lo, ka thlarau zawkin le,’ titu chuan min khawngaihin min va lainat tak em ka ti \hin! Hun rapthlak tak leh thlabar awm em em ka hmachhawn mek laiin min thlamuantu leh min lainattu, min thlamuan turin 30.11.2015 (he hun hi roreltu hmaah ka lan tawpna ni tur tih hriain) ah ka \hian te, kha zozai kha a rawn hruai khawm a, ka lawm tak zet ani.
Min rawn thlamuantute kha a \hen chuan min rawn tlawh fo a, a \hen chu ka ‘court’ hnuhnung ber tur a ni tih hriain an rawn kal hram hram a, an hman vang reng pawh ni lovin, min ngaih pawimawh vang leh min lainatna an  rawn tilang a; ka thla an ti muang khawp mai.Tunah chuanin Lock-up ni tawh lovinkum 14 leh Thla 1 he lai hmun khawhar thlak takah hian  nun kawng ka hman tur chu Lalpan eng tin min hruai zel tak ang maw?

Thlabar-na te, Hlauhthawnna te hian min kiansan ta a. A hun laiin (a sarhu lai) zawng zawngin min hnem turin ka \hian, ka laina ten min rawn thlamuanin min rawn thawrhpui a, ka thla a muangin ka lawm tak zet ani. Ka beisei te rawn lang lo mahse, ka lo rinphak loh te nalamin a hun lai a ni tih hriain min rawn thlamuan a, ka lawm em em a, lalpan a let tam takin malsawm zawk che u rawh se.

He lai kan khuaah hian Kohhran  RUTH MISSION CHURCH a awm a. Christian hi 400 kan chuang a, puitling \hah kan ni. Kan lung a rual em em bawk a. WC Vengpui hi heng tiang hian lungrual ve ila ka va’n ti tak em. He tah chuanin mi thawmhnaw hak hmusita nuihzat \hin te, mi kal dan leh \awng dan zira fiamthu thawh chingte an awm ve lo. Pathian leh Kohhran an zah hlawm em em a, kan Kohhran WC Vengpuiah chuan Pathian leh Kohhran aia mahni in ngai pawimawh nun uluk lo hle si, sawi serh leh sawi zah pawh nei lova \awng puat puat \hin kan awm a nih kha!
Kohhran hruaitu pahnih khat laka lungawi loh avanga Kohhran pum sawichhiat te, an hmel hriat mipa \henkhat nun dik loh avanga Kohhran pumpui dik lo vek anga sawi duh te, mahni hmasial taka an \awng\ainahlawhtlin loh mai avanga Pathiana beidawng daih te awm a ni a, heng ho hi a tlangpuiin nun ho tak, chhungril nun \hatna hloh tawh, a vuivai zawnga engkim ngaihtuah \hin mi, nun kehchhia te an ni duh chawk! Nun belh chian dawl lo, Kohhrana nihna pakhat chelh vanga Biakin pan ve mai mai, chhungril taka Thlarau Thianghlim nena inpawlna nei miah lo kan awm a nih kha. Mi chhanchin a \ha lam zar ni lo, a chhe lam ringawt sawi \euh chung siin, ‘Ka sawi peih lo, ka hre ve lo’ tiin an mi rel chu an han ti tawp a, mi nun en thlaka an tlin lohna chang fan ho hi an nun nen an teh khin duh miah lo a, a pawi khawp mai. Nang  chu I vuivaina tlem te avang khan i rilru kalsualtir duh ve suh.
Engpawl(Denomination)emaw ah chuan i lungawi lovin dik lo i ti a nih pawhin awm zia nei lo turin sawi chhe vak vak kher suh. Mi tam tak Pathian leh Kohhran lak a\anga hruaibo tu i  nih vaih chuan Pathian hremna i chungah a nasa vuai mai thei ania.
Kohhran nei tu hi Isua a ni tih hre reng rawh. He lei  Kohhran hi a famkim vek lovang tih hriat tur ani. Chu tah chuan nang leh kei pawh kan tel, kan famkim lo; mahni pawh famkim lova midang mihring awmkhawm chu famkim bik tura ngaih hi a dik lo ani. Mi rilru dik leh felchuan a lawina Kohhran sawichhe vak vak lovin a dik lohna lai siam\hat tumin theih tawp a chhuah \hin. Kohhran in an tisual nia i hriatna lai leh dik zawkin kal se i tih chuan hruaitute hnenah hrilhin hriat tir mai rawh. Tu tu emaw hnenah \ul lo taka sawi mualpho vak hi Kohhran laka kan awm dan tur ani lo. A neitu kan ni tih hriat reng a \ha fo. Kohhranin a tih sual lai tak sawi fak tur hre mang si lova sawi chhe vak vak ho hi an chhungkua thlengin Lalpan kut a thlak duh ani tih hre reng rawh.

Mizo kan ni a, tlawmngaihna hi kan pi pute hmuh chhuah a ni, tunlai khawvelah  mi changkang apiangin mahni hnam nunphung leh incheina te an ngaisang tawh tih hriat a \ha. WC Vengpui pawh kan changkang tawh hle a, kan nula te mahni Mizo puan ngei bihin Biakin an rawn lutin an inkhawm hi a awmin a zahawm ani. Tlangval te pawn Biakinah thangchhuah kawr hain an inkhawm a, a ropuiin a zahawm a ni;  rui chunga Mizo thawmhnaw inbel \hin te tan a zahthlak tial tial mai ani. Mizo i nih chuan i nungchang a mawi tur a ni a, i ram leh i hnam,  i Kohhran i hmangaih tur ani. Khawiah pawh awm la, Mizo i ni tih hrerengin nun hmang ang che. Ram leh hnam, Kohhran timualpho turin khawsa lo la, ram leh hnam Kohhrantimualphotu chuan Pathian pawh a timualpho a ni, a chhan chu ama siam vek a nih vang a ni. Mizo nih leh mi rel hrat te hi a inhmeh lo. Nu tlingpui siina hmeichhia kan ni bawk tia mi rel hrep ching kan awm a, chung tiang mi te chuan nun an ei chhiain mi tam tak rilru an ti na ani tih hriat a tha. Mi dang chhiatna aiin an \hatna sawi tur kan hre lo a nih chuanin ngawih mai hi a finthlak fo. I rilru fim takin hmang \hin la, ngaihhlut leh ngaihsan dik i neih khan ram leh hnam Kohhranah pawimawhna nasa tak a la nei dawn  tih  hria la, Pathian duh zawng rilru put tum fo rawh.

Kei ngei pawh hi ka famkim lo va, amaherawh chu Pathian aw ngaih chan hi ka tum ran ani. Ka \hatpui tur lungngaihna te, hreawmna te, khawharna te pawh hi ka chungah a thleng tir ani tih ka hria, hlimna chauh hian hringnun a chher puitling thei lova, ka lungngaihna leh ka hreawm tawrhna pawh hian min la kiansan thuai anga, Malsawmnaa innghat lawmna neitu ni lovin, Pathiana innghat lawmna neitu nih ka tum zawk ani. Mihringte hi kan vanneihna a kal tluan lutuk chuan kan chapo a, midang tan bula awm hrehawm khawpin kan lo awm \hin ani. Lungngaihna ka tawhna te hian ka hringnun kawng zawh tur \ha zawk Lalpan min lo hriattir ani zawk si a. Kan pian chhuah phata kan tih theih hmasakber chu \ah hi a ni; \ah chauh chu thiam ta ila, a vanduaithlak hle ang; mahse, \ap reng tura duan kan nih loh zia chu kan nui thei te hi ani. Chu chu Pathian hnen a\angin a thlawna kan dawn ani. Tuna ka awmnaah pawh hian Pathian kut chak chuan min hruai a, kan warden ho chuan ti turin min ti a. I zar kan zo dawn a lawm min ti a; mahse thlakhat inngaihtuahna hun ka la nei, hun ka pawt sei a, chu tih chhung chuan office ah te ka leng lut ziah a, a thawk \henkhat chu tangho zinga mite an lo ni a, kei pawh chu office-a thawk tur chuanin an lo commetee-a; amaherawh chu, chawpchhilhin an mi sawmna chu “Tang officer nih ka duh lo, ka thawk lovang” ka ti nghal a, an thin a rimin an nuih a za ngei mai!
Office-a thawk tur chuan mi bik nih te a ngai a, mahse, hrem ka tawrhnaah  hianin ka thiamna, ka theihna, an ni tan hman ka tum lova, ka \hiante leh Krista tan a ni zawk. Office-ah chuan ka leng lut \hin a, he thil ropui tak hi an lo tar kuau a, chu chu thil dang ni lovin keimah paw’n ka theihnghilh tawh miah loh tur thil a ni. Ti hian a lo inziak a:

Engtikah mah I theihngilh miah loh tur 3
(1) Harsatna I tawh laia phatsan tute
(2) Harsatna I tawh laia buaipui tu che
(3) Harsatna thlentu che

A dikin ava’n \ha tak em. Tunah chuanin kei pawh pangngai takin nun ka hmang tawh a, harsatna ka tawh lai 27.8.2015 leh 30.11.2015 hun chhung kha a ni a, ka thlabarin ka thlaphang em em a. Kha tih hun chhung khanin min tawrhpui tute khan nakinah ti lovin, ka harsat ka thlabar, \anpui ka ngaih hun lai, tawrhpui ka mamawh hun lai hriain min rawn tawrhpuiin min rawn hnem a, chuti ni lovin a la rei dawn em mai tiin emaw,  ‘nakinah’ emaw tiin min rawn tawrhpui lovin leh min rawn hnem lo sela chuan engtin kei mahin tuar ang maw?

30.11.2015 ka hun tawp ber niah phei chuan min rawn tawrhpuia chakna min rawn petute 58 meuh DC office-ah an rawn kal a, ka lawmin ka chak phah tak zet a ni. An hman vang reng ni lovin, hun chep tak karah min rawn thlamuann a, Lalpan an eiin zawnnaah hun \ha pe mawlh rawh se. A hun leh a hmun a zirin nun dan \ha chang sela, an mamawh tinreng Lalpan pe se, tih hi ka duhsakna ani. Kei mah avanga rilrua min lo tuar puitute Lalpan rilru hahdamna pe mawlh che u rawh se. An hriat loh lai paw’n Lalpan a chelh reng a ni tih hi hria se. Min tawrhpuitute he Bible chang hi ka hlan e.

“Ka aw in Lalpa chu ka au va,
a tlang thianghlim a\angin mi chhang \hin a.
Kei zawng ka mu chu ka lo muhil ta a; ka han harh leh a;
Lalpa chuan mi lo chelh reng thin a ni.”
Sam 3:4-5;

Posted in: