Emirates Stadium-ah league hmahruaitu Leicester City chuan Vardy-a penalty goal hmangin si khat faiin hma hruai mahse bench atanga rawn lut pahnih Walcott leh Welbeck-te goal hmangin Arsenal chuan 2-1 in hnehna an chang.
Leicester City hian kum 22 hnua a vawi khat nan Arsenal khelmuala chak tum hle mahse second half tir lama Simpson hnawhchhuah a nih avangin secon half tir lam atangin kim lovin an khel a, goal hnih an chhuah ta a ni.
Leicester City hi chak ngat selang chuan point 8 laiin an fal thei dawn tihna a ni a, mahse Arsenal an chak tak zawk avangin point 2 chiahin Arsenal lakah hma an hruai ta a ni.
Arsenal 2 - 1 Leicester City
(Walcott 71', Welbeck 90+3') (Vardy 45' pen)
Red card : Danny Simpson 54' (Leicester)
Arsenal XI : Cech, Bellerin, Mertesacker, Koscielny, Monreal, Coquelin, Ramsey, Oxlade-Chamberlain, Ozil, Sanchez, Giroud
Leicester City XI : Schmeichel, Simpson, Morgan, Huth, Fuchs, Mahrez, Kanté, Drinkwater, Albrighton, Okazaki, Vardy
First half game a hmuhnawm hle, game-ah Arsenal chungnung zawk mahse chance hlauhawm; goalkeeper save ngai khawpa chance tha Leicester City-in vawi hnih an nei a.Vardy tauh leh Kante-a thuai chu Cech-a'n tha zetin a lo dang. Vardy-a penalty goal hmangin Leicester City chuan first half-ah si khat faiin hma an hruai a, box chhungah Monreal chuan Vardy a titlu, referee Atkinson chuan penalty a ham ta a ni. He penalty hi ennawn leh chuan Vardy kha a fing hle tih a hriat a, Monreal-a ke kha a pal lui a, replay en ve lo referee Atkinson a demawm em em loh. He penalty hi Vardy chuan chiang takin a chhuih goal a, tun season league goal 19 a khung tling ta.
Second half-ah Simpson chuan yellow card pahnih a chawi a, a vawi hnihna phei chu ho takin Giroud a pawtthlu a, Atkinson chuan a hnawtchhuak ta a ni. Leicester City chu kim lovin second half tir atangin an khel a, Wenger-a'n bench atanga a dah luh Walcott leh Welbeck ten goal an khung ve ve ta a ni.
71 mins-ah mual dinglam sir atanga Bellerin cross chu Giroud chuan Walcott-a tan a tauh thla a, walcott chuan hnai set sawt atangin near post-ah a pet goal ta a ni. 84 mins-ah Wenger chuan rei tak inhliam Welbeck a dah lut, ani hian hun tawp dawn tak tak added time-ah chakna goal a tauh lut ta a ni.
Attacking half-ah Marcin Wasilewski chuan tul lo takin Monreal a titlu a, referee chuan foul a ham. Ozil chuan he free kick hi a pet a, Welbeck chuan tauh goal-in, 2-1 in Arsenal chuan hnehna an chang a, champion thei dinhmunah an inhlangkai chho leh ta a ni.
He match hi a hmuhnawm khawp mai a, Leicester City goalkeeper Schmeichel a khel tha a, Giroud-a shot a lo save te phei kha chu ropui tak a ni. Simpson khan ho takin red card chawi lo selang chuan Emirates Stadium-ah Leicester City hian point khat an hlawhchhuah ngei a rinawm a ni.
Credit:
http://www.inkhel.com/post/hun-tawp-dawn-welbeck-a-goal-hmangin-arsenal-in-leicester-city-an-hneh
0 comments:
Post a Comment