Kutpui hmang dawn

Welcome To JEDIDVENA

JEDIDIA Zan Tawngtaite

Welcome To JEDIDVENA

JEDIDIA Zan Tawngtaite

Welcome To JEDIDVENA

Webfree Browser

Welcome To JEDIDVENA

Aboutme

Welcome To JEDIDVENA

Wednesday, April 20, 2016

Khawnvar App update!

https://my.pcloud.com/publink/show?code=kZw5IQZUqfFHImDNx5KAdVRdorVPbE4Skv7


Mizo Tawngun Hmang Thiam Rawh


Mipui hmaah i ding a. Mipui huhang avangin i zam hle a. Tawng tur i van a. I bing mum mum a. I aw i thian sek a. Chi buh nuai, bahlah pelh nawk nawkin i han tawng khur ta a. A ngaihthlak nawm loh tur zia i ngaihtuah letin a hun lai ang maiin i sen awp awp a. Kha vang khan thusawi i awlsam nan Mizo Tawngun i zir a tul a ni.

“Hei a,...ih...kei chu mi ti s’u..mi hmaah thu ka sawi ve ngai lo ka ti chung chung pawhin min nawr lui tlat a...” han tih ai chuan,

“A hmuipuipu ang ziazangin mahni luleng pawh sawi kaw thei lo hi mipui hmaa thu sawi turin min ti miau mai si a..” han ti ta zawk la,

‘E...tawngkam a va thiam ve, a puitling hle mai,” an ti zawk ngei ang che. ‘Hmuipuipu’ tih te, ‘mahni lu leng sawi’ tih te mai khi hman thiam lohna tur chhan a awm hauh lo a. Intih eng emawna a ni reng reng lo. Mipui i zah thiam hle a, puitling takin i dawr tihna a ni zawk daih!

Chutah, “...ka rawn ding chhuak ve tawp a, ka sawi kim loh leh sawi sei deuh chuan min lo hrethiam ula,..” te i han ti leh ta duah a. A ruk takin ngaithlatute an ner ru tih i hriat a tha.

I ‘kamkeu-na’ hian a tituiawm loh zo vek tawh. Chu ai chuan,
“Thiam ang tawk tawkin ka rawn puahpui ve phawng phawng mai dawn a ni a,” tih fel then mai khan bengkhawn i hlawh zawk daih dawn a ni.

Chutah, i uar thiam phei chuan,
“....amah upa tawngah mah, ‘Atirtu’n min tirh chuan saphungah pawh kan kui ngai e, an lo ti mathlawn lovin,..” te han ti zui nghal zat la, mutthluk tum sa leh rilru kawm lo tumsa rante pawh a hawi chhuahtir zawk ngei ang!

Mipui hmaa dina mipui hmachhawn zawnga han intar chhuah hian mipui lu hi ‘zikhlum hlir’ anga hmuh mai chu awl lo tak a nia. Zam luatah ‘lawmthu’ sawi turin mi lung kan ti awi lo palh hlauh thei zawk tih hriain i sawi tur te tawi fel taka i remkhawm thiam theih nan Mizo tawngun hman thiam hi ngun takin zir ang che.

“A awm tak thu sawi hi Tangkaraw bawma rangkachak thei ang a ni.”
Thuf. 25:11;


Thatchhiatna



Hmanlai hian thiandun inkawm ngeih tak mai hi an awm a. Pianpui unau ai pawhin an inhmangaih emaw tih tur hi a ni a.

Hunte a lo inher zel a. Nupui an nei ve ve a. Nupui an neih hnu pawh chuan an la inthenawm zui zel a. Inkawm ngei tak e ti lovin an nihphung erawh a in ang lo hle a. Pakhat chu thiam thil ngah tak mai, mahse, thatchhe em em a ni a. Pakhat erawh chu a taima e tih lohvah chuan a thiam han sawi viau tur a awm lem lo.

Chutichuan, mahni chhungkua ve ve enkawlin hun an hmang chho a. A taima zawk chu rei lo teah into delh takin a ding chhuak a. A hnuah phei chuan khawtlang tlan khawpin a lo nei nung chho ta viau a. A thianpa zawk kha a that chhiat miau avangin kut an dawh lo chauh tawh a.

Thatchhe zawka nupui chu thiknain a bual a tan ta a. A pasal hnenah chuan, “I thianpa saw, hna a thawk ngawr ngawr a, a inkhawl hlum dawn alawm. Kal la, hringnun nawmna va chenpui rawh!” a ti a. Hmeichhe awm nem hian sawi hun an hriat chuan awm khauh zawk mipate hi an pawt fan vel vak thei hi mihring ze mak pakhat a ni.

A thianpa chu a nupui thurawn ang chuan hringnun nawmna hmelhriattir tumin a sawm chhuak a. Thiante sawmna chu engmah hnial lovin a zuiin a hlenpui zel a. A neih zawng zawng chu an tlakral zo ta vek a. A thianpa thatchhe zawka dinhmunah chuan a ding ve ta thuai mai a.

Chutianga a tla chhia chuan thatchhe zawka nupui chu a tilawm hliah hliah a. Manhla ti em em hian a thlir a. A nui var var reng mai a.

Mahse, a rei lo. Taima zawk na na na chuan a thawk leh ta tak tak a. A hmaa a dinhmun aia tha zawkah a invawrh kang leh ta vat mai a. Thianpa nupui hmel chu a ni telin a dur leh ta khup khup mai.

“A hmaa tih chhiat ka tum ang kha chuan tih a chi tawh dawn loh a. Eng tin emaw ka tih chu a ngai a ni. Khawinge, keimah ka’n thawk chhuak teh ang.” tiin a pasala thianpa tih chhiat dan tur thil hmuh chhuah tumin a feh chhuak ta a. Khawtinah a lutin a chhuak a. Ramtin ram tang a fang a.

A kalna apiangah ‘Thatchhiatna nei in awm em?” tiin a zawt zel a. Nikhat chu chutia a zawh kual leh lai chuan, “Hetah ka nei e!” tia chhangtu hi a tawng ta hlauh mai a.

Thatchhiatna neitu in lam ah chuan an inzui ta a. An in a va thlen chuan, “Heta hi a awm e. He thutthlengawn hi a nih hi i thil zawn chu. Hei hi la la, hawn rawh. He thutthlengawn hi a nia ka pasal tihlumtu chu. La rawh, a pekin ka pe ang che.” a lo ti a.

Chu a thilpek dawn chu a hawn a. A pasal thiantha  leh taima em emte in ah chuan va keng lutin, “Hawh awi u, ka zinnaah hei hi ka va hmu a. In neih atan ka it em mai a. Ka rawn hawn che u,” tiin thil tha hawnin a va hawn a.

Anni pawh chuan lawm takin an lo dawng a. An inchhungah chuan an hung ran mai a. En mai pawhin han thut chhin a chakawm hliah hliah a. Kawng kham changa han thut awn riai riai a lem riau mai bawk si a. Chutichuan, pa taima em em chu a han thu chhin ta a. A rin ang ngeiin thut awn riai riau chu a lo nuam a. Thu awn chunga midang han tirh kual velte chu a lo awlsam hle a. Lighter han ban tur takngial pawhin tha a thawh peih tawh lo. A fate a tir a. A rem rem a tir kual a. Awmhmunah tih tur a lo tuk a. A lo kawk kual a. Ro a lo rel a. A duh anga an tih vat loh leh a awki a san vak vak a. Inleng neih lai e, lai lo e pawh sawi lovin a hrawk vak vak a. A nupui fanaute chu a vin phar dawr dawr a. An inchhung mizia chu a lo danglam ta em em mai.

Chhungkaw hlim thei, taima, tirh ngai lo tia mi hriat thin kha tunah chuan inhau hmang, inphut tawn reng, invin vak vak ching chhungkua anga hriat an lo ni ta a.

Pa ber lah chu thutthlengawn chuan a taimakna a zuk da tial tial a. Mawng han kan zauha fel mai tur thilah pawh tirh tur a dap chung tawh a. A chhungkua te chu mawhchhiatna aw chhe pui pui a chhakchhuah khum reng a. ‘In that chhe lutuk a, in tlaktlai lo lutuk a,” tih ang tawngkamte chu a ka atangin a chhuak awl lo a. A thawh tur, a taimak lawmtuten a kuta an dah te chu a hun takah thawh zawh fel lohvin a tiang vum er ur a. A thawh hlawh tur lak a chak a, thawh zawh fel lah a nei si lo. A ni telin a tla chhia a. Tho kang leh thei tawh miah lovin a lo chhe ta a ni.

A thianpa nupui, chu thil lo thlir rengtu leh chutiang thil a thlen duha thahnemngai em emi chuan duhthu a sam a. ‘Thutthlengawn mai ni lovin, thutna dup nuam takah han chang thei teh ila aw, mi taimakna zawng zawng hi ka han zuk da vek mai tur!” a ti vawng vawng a. Amah chu thutna dup nuam takah chang thei lo mahse, a duhthusam erawh khawvelah hian a tak hmuh tur a awm ta teuh a. Mi hausa in tawh phawtah chuan he Thatchhiatna hi mawi takin an hung thin zu nia.##

“....mihring sum hlu chu taimak a ni,” Thuf. 12:27b;


Khawnvara Thu Chhuah Chungchang



WY Vengpui thlatin chhuak Khawnvar News hi a thlawna sem a ni a. WY Sum zawnna a ni lo. A thawktute pawh Editor atanga a semtute chen hian hah man awm lovin thlatin hmel thar put ve tumin hma kan la a, kan thawhho thatna azarah kan inchhi eng ve zel a. Hei hian ziak hmanga rawngbawlna hi Lalpa remtih zawng a nih a tilang chiang hle a ni.

WY member tinte chanchin tarlanna ni thei se tih hi duhthusam a ni a. Chanchin inkhawn erawh a awl lo hle. In tin lut chhuaka chanchin han inzawt chat chat turin kan hun neih hian a zir thlawt bawk si lo. Hetiang hi a  nih avangin a awlsam zawk nan tiin Facebook lamah Group te kan siam a. Chuta tang chuan member tu pawh chanchin inhrilh pawpin, harsatna te, lawmna te, lungawina te inhriattir tawn a nih beiseina a sang hle.

Mahse, beiseina chu a ni telin a tham ral mek. Facebook lama kan group ah chanchin inhrilh hriat a ni ngai lo a. Dam leh dam loh thu emaw, lawm leh lawm loh thu emaw pawh kan inhre thei chuang hek lo. Hemi zawnah hi chuan WY te kan harh a ngai hle. Tunlai huna WY kan nih chuan phungphai thluk hi kan zir a hun ta!

Mahni mum mum, mahni tlei tleia, mahni tuina muala mahni awm awma awm mai hi kan nih dan tur a ni lo e. Lawm lohna nei chuan kan lawm loh thu hi kan inhrilh hreh tur a ni lo.

Khawnvara thu chhuah chungchangah pawh hian ‘chumi thla chhuak, chumi thupui kha a chuti a khati..’ tiin ama huangah rawn ang ve buan buan teh u. Hmun dangah inrel phar lovin! Mi mi puitlingte tih dan kan rawn zir zel dawn a. ‘Thlirna’ lam hawi pawh kan rawn chhuah zel ang. ‘Thlirtu thlir dan’ te chu a helh leh chhang thei tan hmun a awm tih pawh kan inhriattir nghal bawk. Hei hi kan rilru lam insawi zawi nan a ni.  

Kan Kohhran leh WY hi TMEF leh GEMM innuaina karah kan awm a. WY Khawnvar hi eng lamah mah awn bikna a nei lo tih kan hriat tlan a pawimawh. Sawisel a neih avangin a sawisel loh lam a side tihna emaw, fak a neih avangin a fak loh lam a nek emaw kan tih chuan kan thelh duai ang—Krista-a unaute an ni vek si a.

Copy 350 ni thin kha phek tih tam thahnemngaih vangin copy 200 ah siamin phek 12 neiah kan chhuah a. A semtute hnenah, ‘Ka chhiar ve chuang lo,’ lo ti mai mai duh tawkte kan awm nia hriat a ni. WY Vengpui member nei chhungkua chuan a thlawna kan sem hi ‘IN CHHIAR VE NGEI TUR A NI’ tih hi na takin kan inchah e.

WY rawngbawlna tih chang tlun duhin thlatin hian a senso tumtu kan nei zel a. Thlatina hmel inlan thei tura kan thawh chhuah hi awmhmunah bawp khawkherhin emaw, inthiar paha a tlak fel hun nghah pahin emaw tal lo chen ve ang che.

‘Kan chhiar ve hman chuang lo e,’ te lo ti kawi sawi in awm leh a nih vaih chuan a leh hnih zela pek in ni ang tih kan inhriattir a ni!###


HUMANISM


by: Charlie Tlau


ENGE HUMANISM CHU
Humanism chu non-theistically based philosophy a ni a, mihring hi engkim tehna chu a ni. (tehfung chu Mihring—Bible ni lovin/Ed.)

18th Century a Rationalism leh 19th Century vela free-thought movement kan tih atanga rawn piang ani.

-Deity emaw, god emaw sawi hi awmze nei lo emaw, opinion pawh neih ngai lo a ni.

-Nundan tha tak leh moral life hi reason hmangin a siam theih.

-Mihring te hian keimahni tan pathian tam tak kan insiam

-Human rights chungchang an veiin mi zawng zawng intluktlanna an dah sang hle.

-Heng topic leh issue abortion access; equal rights for gays, lesbians, amd bisexuals; transgender persons and transsexuals (GLBT); same-sex marriage, physician assisted suicide, separation of church and state, etc. ah te hian ngaihdan fumfe tak leh liberal tak an nei.

Supernatural kan tih ho hi an rin ve loh avangin nun pawh hi natural process a ni a. Midangin heng supernatural concept ho God, heaven, hell, life after death etc,.. an rin chungchang ah pawh an ngaihdan an zah sak thin avangin nun awmzia hi reason leh science hmanga sawifiah an tum thin a ni.

Thih hnua kan awm dan tur suangtuaha rilru sen vak ai chuan he leia kan damchhunga kan mihring puite chunga thatna lantir hi an tum ber a nih  avangin tun (present) hi an ngai pawimawh hle a ni.

HUMANISM HRANG HRANG TE
1. Christian Humanism: Mihring te zahawmna (Universal human dignity) leh mimal zalenna (individual freedom) hi Christian rin dan leh practice ah a pawimawh ber a, chu chu Christian zirtirna leh humanist principle atanga lak a ni.

2. Cultural Humanism: Hmanlai Greece leh Rome ho atanga lak a ni a; hriatna (knowledge) hi reason leh rational thought hmangin a neih theih tihna a ni. Chu chu scientific development nana tun thlenga tangkai a ni chho ta zel.

3. Modern Humanism: Religious leh secular humanism kaihpawlh a ni a, an thil rin thenkhat chu theistic deuh lai leh atheistic na an nei thin.

4. Philosophical Humanism: Philosophical movement ni in mihring te mamawh leh interest dan sanna

5. Renaissance Humanism: Middle Age tawp lama rawn chhuak a ni a, classical studies ho ah intuai thar lehna leh concept of truth chu mihring te thawhrimna liau liau hmangin a hmuh theih.


6. Secular Humanism: Non-religiously based philosophy anih ang in mihring chu tehna tawpna ani a,18th Century a Rationalism leh 19th Century vela free-thought movement kan tih atanga rawn piang ani.

7. Religious Humanism: Secular Humanism nen in anna kawng tam tak ah an nei a; mahse, hei hi chu religious setting kan tih mai (theistic) lam a ni a,rinna leh ritual te an ngai pawimawh hle a ni.

HUMANIST LAR DEUH DEUHTE
Sisaac Asimov, scientist and author: Margaret Atwood, author and literary freedom activist :
Brock Chisholm, physician and first Director-General of the WHO (World Health Organization):
Albert Einstein, physicist and conceiver of the Theory of Relativity:
Betty Friedan, feminist activist: R. Buckminster Fuller, futurist and inventor:
Julian Huxley, philosopher and first Director-General of UNESCO (United Nations Educational, Social and Cultural Organization):
Richard Leakey, anthropologist: Abraham Maslow, psychologist and creator of Third Force Psychology: John Boyd Orr, the first Director-General of the FAO (Food and Agriculture Organization):
A. Philip Randolf, human rights activist: Carl Rogers, psychologist and creator of Client Centered Therapy:
Bertrand Russell, mathematician and philosopher:
Jonas Salk, physician and developer of the polio vaccine:
Ms. Margaret Sanger, founder of Planned Parenthood:
Andrei Sakharov, physicist and human rights activist:
Gloria Steinem, feminist activist, and founder of Ms. Magazine(Copyright © 1989 by Frederick Edwords).###


Smart Phone i hmang Smart em?


Khawvel ram zau nia kan hriat chu inbiak pawhna changkang zel avangin a lo zim tial tial a. Khawvel chu ‘Khawte lian tak’ ah a chang zo ta a. Chu chuan kan sum thawh chhuah lam ngaihtuah lova tunlai duhna pawh a keng tel a. Keini, a khaw chengker leh veng kil khawra thlum al rawp tawka bak berhte ngei pawhin Smart phone ri rel rel thei ai chuan Ks. 150000/- man aia sang kan hum ta fir fer mai.


A ba thla leh khel benga kan lei, kan duat, kan zuat hliau hliau, kan Smart Phone man to tak takte chu Ooredoo leh MPT(mahni huang chu pel lo ila) connection tha chho zel avangin inbiak nan ngawt kan hmang bik lo a. Facebook khawih nan, Viber leh Whatsapp hmanga inbiak pawh nan te pawh kan hmang a. A tha, hetiang tur hi a ni. Mahse, Smart phone tha i nei a, a tawh tawlh chi (touch screen) a ni bawk a, mahse, i han tawk hlek a, eng lai pawha Facebook khawih nan, chatting tih nan ngawta i hmang a nih chuan i hman dan a la smart tawk lo hle a, i hun i khawhral thlawn a, puk chawpa i lei Smart phone chu i la hmang smart lo a ni.

Google ching rawh: Google chu a thlawn liau liauva hriatna min pe tu a ni. Lehkhabu man to tak tak, mahni sum senga lei dawna engtik khawtik maha kan lei ngai loh turte chu a thlawna lakna tur te, chhiarna tur te min kawhhmuh tuar theitu a ni. Google Search bar ah khan i thil hriat duh kha han chhu kai keuh la, han enter teh. I um zui tur a rawn tlar tuar mai ang.  I ph chungchanga harsatna i nei a nih pawhin chu i harsatna chu a chhang theitu a zawn hmuhsak tuar thei che.

Computer ka khawih hlim hian kei pawh Windows intall that fo a ngai a. CPU ka pu phei zing lutuk hi min siamsaktute pawhin min nuih tha peih tawh lo hial  a ni. A tawpah Google atangin a tih dan ka han zir ve ta a. Chuta tang chuan dawra ka put ngai khawp hi chu a chhe sawp rawp hneh hle tawh a ni tlangpui thin! Mi lehkhabu chhiar lai chhiar hawh dilin a tlawna ka tlawn hliau hliau thin lai kha ka hre reng mai. Google Search bar ka hman thiam chinah chuan ka mamawh zawng zawng deuh thaw chu a thlawna chhiar theih mai, print chhuah theih maiin ka hmu ta teuh a ni.  Ka han sawi tum chu, Smart phone kan nei a, Facebook nan, Chatting nan vel chauhva kan hman chuan Internet chak kan neih man a awm lo a, sum kan sen ral tam phu tawkin kan la hmang lo—hawh u, smart taka hman i zir tlang ang u tih hi a ni e.###


Bible Zir Puitu



Gen 1-3 chuan Thil Bulte min hrilh a: Lei leh Van siam thu te: Ni ruk chhunga lei leh vana thil tinreng siam a nih thu te; Mihring siam thu leh a dinhmun te: Mihring suala a tluk dan leh Mihringa sual luh dan te kan hmu a.

Rom. 1:18-3:20: thu ah hian Thinlung sual, Tih sual, Thatna sual, Tih loh sual, Felna sual, Rinna dik lo sual leh Nihna sualte chu min hrilh a.

Rom. 3:21-6:23; ah chuan Tlanna te, Thiamchantirna te, Rinna te, Pathian nena inremna te, Siamtharlehna(Kros Hnathawh) te kan hmu leh a.

Rom. 7 ah chuan Gal. 2:20; thu hrilhfiahna kan hmu a.

Rom 8 ah chuan Gal 5:16-25; sawi zauna kan hmu.

Heng hi hrefiah lovin, varpawh lovin, zir chiang lovin i nunpui thei a nih chuan WY Khawnvar ah hian kan lo chhuah ang i chan ram chu!

Exodus bu kan chhiar chuan Isralel fate Aigupta bawih an nih chhung hrehawm zia leh Pathian Chhandamna lawmawm ropuizia kan hmu a. Aigupta nena inthenna tuipuisen an kan hnuin Pathian Dan Thianghlim chu ‘Ka ti thei ang a, ka ti ngei ang’ tia intiamna nen ‘Dan Thuthlungah’ an intulut a. Chumi Dan hnuaia kun chhinchhiahna Serh tan leh Sabat Serh chu an thupui a ni.

Rom Lehkhathawnah chuan Sual bawih te awm dan leh sual bawiha awmte Pathianin a hawisan dan, ro a relsak dan tur te kan hmu a. Pathian Fapa mal neih chhun thisen leh hnathawh zara sual laka tlan chhuah kan nihna te, thiamchantir kan nihna te, leh mi thar, fa thara min hrin dan chiang tak mai chu a hauhuk kai atangin min hrilh a. Dan hnuaia kunte anga intiam ve mai mai ni tawh lovin Krista Isua-ah chuan sualna leh thihna dan lak ata zalenna min chantir dan chu min zirtir a ni. Rom Lehkhathawn atanga kan hmuh chian em em chu Ringtu nun hi ‘intiam kam nun’ a ni lo va, ‘nih chilh nun’ a ni zawk tih hi a ni.


Gen. 1-3 leh  Rom 1:18-8:32; thleng hi Exodus bu leh Rom Lehkhathawn pumpui nen hian ka vaibel ti khawpa i zir a, i bel hle chuan Thutak Camping Thupui tlangpui i hmelhriat dawn tihna a ni. Eng pawh ni sela, Bible aiin midang nunah ei tur zawng fo mi i ni em tih hi lo inbih chiang la, lo dam la, chhiar la, chik la, vawng la, hria ang che!#


Ringtute kawchhungah Ramhuai sual a lut Thei Em?



by: Buanga

Tunlaiah keini Mizo Thutak fate, zirtirna hrang hrangin min nuai tan ta! Thenkhatte chu kan hlawkpui viau a, thenkhat erawh min tibuaitu mai an ni thung. Thlarau indona zirtirna lam pawh kan lo hmelhriat ve leh tan a, chu chu Pathian thu lama thanlenna chi khat chu a ni ngei ang. Mahse, eng zirtirna pawh ni sela, kan rinna innghahna Bible atanga teh vek tur kan ni. Beroia mite khan tirhkoh Paula thu sawi leh zirtirna zawng zawng chu tha ti hle mahse, a zirtirna chu Pathian thuah a awm nge awm lo (Pathina thua innghat a ni nge ni lo) an chian hmasa phawt thin a; Paula rawngbawlna pawh a kal tluang hle a ni kha (Tirh. 17). Chu ngei chu keini Thutak fate pawhin kan hriata kan thanharh ve hi a hun tawh tak zet a ni.

Tunlaia thlarau lam indona vawrh lartu zinga a langsar ber pakhat chuan, “Ringtu piangthar thate hi thlarau sual (ramhuai)-in eng emaw ti zawng in a man (ramhuai luh khung) thei a, thenkhat phei chu an aw te hial a danglamin tawng dangte hialin an tawng thei!” tiin a zirtir a. Chu a zirtirna nemnghah nan chuan a tawnhriat a hmang a; Bible hi chu ringtuin  ramhuai sual a pai theih leh theih loh zirtirna nemngheh nan leh hetiang chungchang zirtirna atan chuan tling tawk lovah a ngai bawk. Chuvangin, ani chuan Bible ni lovin, a ma tawnhriat (experience) ngei atang leh midang tawnhriat atangte’n leh a counseling-na ah innghatin ringtu hian ramhuai an pai thei a ti hmiah hmiah mai a ni. Tunlai kan khawvelah chuan mi’n huai taka thu a sawi ngam phawt chuan a awih ngam tawk an lo awm leh mai thin a; kan Kristian-na huang chhungah phei chuan hmuh leh hriat tur a tam leh zual! ‘Chumi kum khami kumah Lal Isua a lo kal dawn’ tih mi’n huai tak maia a sawi chuan a awih tawk hi an lo awm leh  tho tho thin. Tun hi Beroia mite tih dan kan zir a, eng ang zirtirna pawh nise Bible-a innghat zirtir-na a nih leh nih loh kan bih chian hun hle tawh a ni lom ni?

Kan tawnhriata kan innghah lutuk chuan, sakhaw dang ho angin bumin kan lo awm ve anga, kan danglamna a awm chuang lo vang. Kan Bible hi kan thurin leh thiltih tehna diklo thei lo a ni. kan tawnhriat ngei pawh Bible hmangin kan teh thin zawk tur a ni. Kan Bible hi khawvela kan awmchhunga Pathian duh dan leh Amah kan hriat chian theihna a ni. Chuvang chuan Bible-in engtin nge a sawi ti zela nitina kan thil hriat leh tawn, pawm nuam kan tih leh awih mai sam te hi thlir a, chik tur kan ni. Kan thupui hi Bible enin i lo thlir ve teng aw.

Bible khawi lai mahah hian ringtu, thlarau sualin a man (ramhuai pai) tih hmuh tur a awm lo. Chanchin Tha leh Lehkhathawn ah te ringtu tu hnenah mah, “Ramhuai a pai loh nan fim khur rawhse,” tih lam hawia infuihna emaw,  zilhna a awm lo. Tuman ringtu chhunga ram huai an phuarin an hnawtchhuak kan hmu bawk hek lo. Lal Isua leh a zirtirten ramhuai an hnawhchhuahna zawng zawng kha kan chik a, kan en nawn leh chet chet  chuan ringtute ni lov in, ringlo te chhung atang vek a ni tih kan hmu zawk ang.

Entirnan : II Korinth 6 chuan ringtute hi Pathian Thlarau Thianghlim In (Temple) kan ni a, kan chhunga awm Thlarau Thianghlim leh ramhuai an chen dun theih loh zia  lantir nan tihian a ziak: "Beliara leh Krista pawhin engnge inngeihna an neih? A nih loh leh ring lo leh ringtu chuan engnge chan dun an neih? Milemte leh Pathian biak in pawhin engnge inremna an neih? Keini zawng Pathian nung biak in kan ni si; Pathianin, 'Anmahniah ka awm ang a, Anmahniah ka leng bawk ang; Tin, an Pathian ka ni ang a, Anni pawh ka mite an ni ang,' a nih ang khan."(chang 15-16). Kolossa 1:13; chuan, "Ani chuan thim thuneihna laka min chhan chhuakin, a Fapa hmangaih taka ramah chuan min kaitir ta a;”... tiin kan hmu bawk.

Hei hian ringtu chu Pathian lal rama awm a nih tawh avangin Setana meuh paw’n a chhuhsak thei lo tih min zirtir a. Rom 8:37; chuan, ",...ropui taka ngam tu kan ni!" a ti bawk. I Korinth 15:57; ah, “Krista zarah hnehna changtu kan ni” a ti a. I Johana 2:13; chuan, “,... mi sual (dibola) ngamtu kan ni” a ti. 4:4; ah pawh “,...kan chhunga awm Thlarau Thianghlim chu a chak zawk avangin a ngam vek thu min hrilh. Heng Pathian thutak zirtirna zawng zawng en hian eng vanga ‘Ringtute chhunga ramhuai lut thei zirtirna’ tih vel hi pawm thei ta mai nge kan nih le?  Bible a daw ve ngai bawk si lo. A nih chuan ringtu ni awma kan ngaihte chhunga thlarau sual lut nia kan hriatte hi ringtu dik ni loin a suak leh sakhaw mi tha an ni mai zawk lo maw?

Bible chuan kan thupui chhanna chu ‘Aih’ a ti a. Bible zirtirna hi tehfunga hmangtu zawng zawng tan chuan kan thupui chhanna chu Bible zuiin ‘Aih, lut thei lo e,” tih hi a ni e.##


Editorial

In dam tlang em?
Krista-ah i dam em? Krista-ah ni lo damna te i lo chang em? Damna Krista kan nei hi kan damna tak a ni si a.

April kan kai hi a lawmawm a. Khawnvar pawh kan la inchhi eng zel thei hi a hlimawm hle. Mitin lawm hlawh erawh beiseina a awm lo. Eng tak, mitin tiengtu pawhin mitin lawm a hlawh si lo.

Tumah mahni tan kan nung lo. Mahni tan ngaihtuah viau mah ila mahni tan kan nung lo. Setana chaw lakna kan nih loh chuan Krista tana nung kan ni. Miin ‘ka duh thlanin ka sual’ ti eng ang mahse Setana chaw lakna mai a ni a, miin ‘ka duh thlannain Lalpa tan ka inpe’ pawh ti sela, ‘felna bawih ni tura tlan chhuah, mahni ta pawh ni tawh lo,’ kan ni. Mahni ta lova thu neih tum hi mi bo awm dan a ni.

   Khawnvar Editor hian thlir dan key khat a nei a. Chu chu Lalpa thlir dan a ni. Tehfung pakhat a lek a. Chu chu Bible a ni. Tu ‘rinna leh thiltih’ pawh Bible atanga teha tling lo apiang chu a pawmtlak loh dan kan inteh chhuahsak zel ang.
Buh chi thehtu buh chi theh tehkhin thu ah khan ngaithlatu lam dinhmun pali kan hmu a; pialtlepa tla tawka buh chi thehtu leh pialtlepa tla tawk vela beng dawh kan kel ek tam ta hian ni a lo tlangsan hleka vuaia rawp ral nghal mai thin ringtu ni vea inngai a hring pung zel a. A let sawm thum te, sawm ruk te, a let za tein a pung hman thin lo chu a nih tawh ber hi!


Monday, March 7, 2016

SECRETARY ZOTHANGLIANAN NUPUI ATAN A ANPUI A NEI DAWN

Tunlai khawvel, khawvel pangkhing lehlam leh lehlam inkawmchhak inkawmthlanga ‘khawte tak te’ a nih tawh hunah hian ‘nunphung thar’ leh ‘chin dan thar’ tuilian min chimtu hi a dana dan zawh rual a ni ta lo! Fundamental Evangelical Kohhran leh rawngbawltu an hlangna anga kan lo hriat leh Kristiante min thlamuantu ram ropui USA ngeiah mai khuan ‘Neih inang inneih phalna dan’ leh chutiang neih inang inneite chu lungtena thinhrik a hnehin ‘mihring pangngaia chhiarna dan’ te an han zam chhuak ta a ni a. Chumi pawm lo mihring chu a ‘tunlai tawh lo’ a, an khawvelah an leng lo zel tawh mai! Kristian hming pu mimal pawl ding zinga thangduang ber Lakewook Kohhran, keini pawhin a Mizotawng thiam kan ngaihthlak tam avanga kan lo ‘uar ve em em’ Joel Osteen-a pawlah ngei mai pawh a member tam zawk chu neih inang inkawpte an ni a. Amah lahin, ‘Keinin kan lo en hran a ngai lo e,’ a ti mauh mai bawk si! A hmel ena zawng leh ngau kara seilian ve ngeia lang Pakkiau-a, boxer ropui tak pawhin, ‘Neih inang inneite hi chu ran ai pawhin an hniam,’ a ti chiah mai a. Tunlai Kristian mah ni sela, tunlai Kristian te pawhin a thlavang an hauh ngam lo. Nike Company pawhin an inzawmna a chhu chhat zui nghal. Hetianga ‘tunlaina’ tuilianin Kristiante leh Kristianna a nawr kuak duak duak lai hian thiante hren kang tawhin ‘Zawiin le,’ an la ti chauh ang mai hian an hmu ‘tha pangngai’ thei fai vek zel mai a. A awmzia ber chu kan hmuipuipu Rev. Dr. Rohmingliana kam han hawh zuai ila, ‘Sawiseltu nih hming chhiat’ ai chuan ‘Ngawihbo hming that’ hlawhah an/kan tlak zo chu a ni ta ber e. Bible kan chhiar thin. A thawnthu kan hria. Kan nuna lakluh pawh kan tum. Chutiang tur pawhin kan infuih fo. Awmzia a neih dan chu a hrang nuai nuai mai thei. Kristian tunlai tum kan tam em em dan atang hian chu chu a chiang viau a ni. Lawng tuk tura koh a nih atanga kum 100-na thleng khan ringtu, Nova kha a hun lai milin a tunlai ve chuang lo. Tawpin tai tih awm lova khawvelin thil thar a dapa a rawpa a rawp huam huam lai pawhin kan Bible hi chu hmana an chhiar thin leh tuna kan kuta awm hi a tunlai phah hluai chuang lo. Bible ringtute pawh chutiang tho chuan an tunlai tual tual ngai chuan hauh lo. Chutiang zelin Bible-a kan hmuh midang chanchin pawh chhiar thla zel ila kan hmu thei ang. Bible-a ziah lan ve loh keini ringtu tunlai ho erawh hi chu tunlai Kristian nih tumin Kristian tunlai ah kan chhuak mek chu a nih hi maw le. ‘Tih theihna Nun min pe a, kan ti thei,’ kan tia, ‘Tih theih loh nei lovah’ kan chhuak mek chu a nih lawi si hi! Gen. 2:26-27 thu kha chhiar ila. Pathianin a ‘anpui’ a siam a. Mipa leh hmeichhia an ni. Kan Secretary Zova pawhin a anpui a nei dawn. Pathian anpuia siam hmeichhia, a kawppui tur ngei mai chu. Kristian tunlai ni lo mahse, tunlai Kristianah chuan Pathian thu nen a inmil hle. Mahni anpui nei rau rau ah pawh Pathian anpui ngei mai nei tur a ni a. Uar lutuk awm lovin kan lawmpui a ni.# Lëngi runa kaiin valan a chhai a, Anka nemten biahthu hlanin a fah thlum ngei e; Lengi lung lawm a sen, a tai, a biangnote, Chutin, chawnban kaiin runhmun len dun zai an rel. Vala tirhin an kai palai lengi runah, Chhanna anka a thlum a nem, a zangkhai ngei e; A lawi dawn chiang Zova runah Lalhuanmawii, Chutin, chawnban kaia tiamin an hlan rinawm thu. A sakhming lem ‘Tete’ an ti, Engtin nge maw ‘Zova’ kher hi; Duhaisam di i tih theih le? A sakhming koh duat nan ‘Zobawih’ kan ti, ‘Khi zun ngai’ val a val thlawn lo; A rîm, a chhái, a man fuh ta, run rempui tur, A har ngei ang zan mut chhin zai rel.

K. ZOVA SAILO CHHAKCHHUAK FL LEH A THURUK ‘NUPUI NGAMNA’

Kan thenawmah hian mi pakhat a hming, K. Zova Sailo FL Chhakchhuak a awm. Uite buk var tak a nei; mahse, a thi tawh. Amah chu hmu ngai lo tan pawha ngaihawm, a kawm chiang tawh tana bawl nuam a ni a. Fuih pawrh nuam tawka fing, a fing tawk chauhva ti ve thin a ni. Fanu fel tak a nei. Koh duat nan ‘Zizi’ kan ti. Ani chuan an nu rawn chuang lovin, ‘Thangi’ a ti ve tlat. ‘Thangi’ a tih kher chhan chu sawi ngai a ti lem lo. A duh a, a hmin a, a ngaina a, a ko a ni mai a ni. Nupui ngam chungchang bikah ani aia entawn tlak hi kan thenawmah an awm lo. Hmun dangah chuan an lo awm pawh a ni thei. Kan thenawmah na na na hi chuan ani tluka nupui ngamna thuruk zawm tha leh hre tha an awm lo tih ka chiang sak ngam. Kei pawh hian ka la entawn ve ang-ka neih ve hunah! “Engtia chutia nupui ngam bik nge a nih le?” tia min zawh chuan ka chhang ang. “I uar a ni lo maw?” tia min zawh paw’n ka chhang ang. Engkimah a hma khalh Hei hi a nupui ngamna chhan pakhatna a ni. A pawimawh khawp mai. Ka rin dan dik tak a ni chiah lo nain ka rin dan chu a ni tho. Engkimah an nu hi a hma khalh thin. Entirnan: chaw an han ei dawn a, chaw ei siam ah te, an ei kham fel hnua nu ber a la ei mek laia senghawi paha a chaw lak belh tur lo khawrh(sak) khalh ah te hian. Engkimah a hma khalh vek thin. Thu a sawi nawntir ngai lo, vawi khat hi tawk a ti Hei phei hi chu mipa ka ni inti nazawng, nupui ka nei ti ve pangngai satliah mai maiin an tlin loh a ni. Eng thu pawh an nu’n vawi khat a sawi tawh chuan a thunawn a awmtir ngai lo. Entirnan: “Bazarah chutiang khatiang chu ka hmu a, a nalh khawp mai, lei ila ka ti a,..” te lo ti sela. A vawi khat sawinaah a lei nghal var thin. Vawi khat aia tam a sawi a remti ngai lo. Mawhphurhna a la ngam Hei phei hi chu mipat mipatna zawn atanga thlir chuan Mizopa ‘chaw no khat ei theuh theuh,’ ah pawh mipa tlin phak bak a ni. Mahse, ani chuan a tlin tlat. Entirnan: “Nu-i, inchhung khawsak vawn fai leh ei rel zawng zawngah lo inrawlh suh. Keima mawhphurhna a ni. I hak laite kha suk nghal a ngai em? Blanket ka suk pah hian ka lo nuai pah mai mai ang e.” te a ti a, a nuai miah miah mai a ni. A hna leh a tih tur chin a hria “Nu-i, bazar te, chhiat ni that ni ilo te leh phungphaithluk ngai ang chi zawng zawng chu ka hna, ka tih tur, keima huang, ka pual liau liau a ni; lo bengvar ve duh suh,” tiin a hna leh a tih tur chin hi a hre chiang hle thin. A hnial, a hnar fithla hmak thin “De de dei dei dei…ngai lo, ngai lo…ka kham lo, ka rawl lo, hmeh ve ka ngai lo…tha nâ ka nei lo…” a tihsan hmak thin. An nu’n hetiang zawnga a chunga a kut a lek hi a duhin a duh lo bur! Khauh takin thu a pe “Het, thu rawh, awm mai mai rawh! I thiam lo. Ei rawngbawl leh a bawlhlo siam chu kei aia innghahna tlak he in chhungah hian tumah in awm lo. Lo khawih ve ziah suh!” a ti a. A che nghal sawk sawk a. Rei lovah thingpui thlum tui tak a rawn peih fel diam thei zel(‘tui tak’ tih laiah tak hian Nl. Cheri pa kha hriat chhuah ni thei se. /Ed) A thil tih turah a rawn si se kher lo “Vawiin i pianchampha phak ni lawmawm tak tur hi thlir ranin thla hmasa daih tawh khan rangkachak thi hi i hriat miah lohvin ka lo lei diam che a ni.” tiin duat tak, ena zah tak, thlira tih dek hmel ang puin a awrhtir hnawp thin. He thu ka puan chhan Thuruk apiang hi ngaihthlak a nuam thin. Keini belval vala val rei un khun hmuar hmanlai tawh lam tan pawha beisei tur, a la awm ve zel chhung hi chuan hetiang thuruk, pa nih hnua phawrh ngam tawh loh tur hi am leh uar lutuk awm lova lo puan lawk a ngai a ni. Chu bakah kan tirhkah nupui nei turin a vau chhuah Driver Khalhtu atana tling em em ngei mai pawh hi a rawn Wesleyan Nu ve tak tak hunah chuan ‘he dan hi ka lo hre ta e,’ tiin ‘Nu nihna’ a la rawn au pui ve ngei hi a rinawm tlat a ni.

I TLAI THIN EM?

by: Mahruaia 1. Tlai fo hi chu chhungkaw inkaihhruai dân thalo (disfunction) zia pakhat a ni. 2. Mi tuanmuang apiang an tlai thin chu ang lo va, mi tuan rang fe fe tlai reng a awm theih tho. 3. Tlai bik fo hi chu midang/thawhpuite zah loh vang a ni thei. 4. Tih loh/kal loh hreh si, kal peih bawk si lote hi an tlai thin. 5. Tlai duh hauh lo hi chu an tlai lo mai thin niin a lang, tlai pawisa lo chu an tlai zel mai. 6. Tan hun sawn tlai pawh hian a tlaia te chu an tlai reng tho thin. 7. Tlai lo turin hmanhmawh phili kher a tul chuang lo va, mi hmanhmawh phili chúngte zîngah tlai an awm tho. Hun manage thiam a tûl. 8. Chhuanlam chu a awm zêl, mi sincere an tlai rèng ngai lo. 9. Tlai réng maite hi mi rilru hrisel lo an ni thei bawk. 10. Tlai fo maite hi planning felfai tak nei lem lo te zingah an chhiar tel theih awm e. Chuvang chuan, thil engkim tihna apianga tlai nih i tum lo ang u. Tlai loh hi hmasâwnna kawnga rahbi pawimawh tak pakhat a ni tih hi i hre thar leh ang u.#

COMMITTEE MEMBER HUAM NI 1 CAMPING THLIRLETNA

by: Editor Saya John Lianhnuna hi rawngbawl zelna tur hmachhawp neiin a thu muang hman lo hle a. A hmabak a sawi chin, chiang vak lova kan khar chhawn theih chu Khampat lam zar khawi khawi ah emaw rawngbawlna tur ruahhman fel sa a neih bakah Zohmunin an ruai dawn tih hi a ni a. A hun chep tak karah kan WY Vengpui ni 1 Camping ngai pawimawha kan ngenna a rawn tihlawhtling hi a hluin a lawmawm tak zet a ni. Amah kan lo nel sa bawk a. Amah pawhin mikhual duk lovin kan beisei ang takin min kaihruai a. A tul hunah min chhuahchhal a. A changin min fak a. A changin duhthawh takin min fuih bawk. Homework pawh min pe tha hle a. Gal. 5:17-24 thua ‘Tisa Thiltih’ chi 15 chu ka vaibel ti thei khawpa chham mawlh mawlh tur leh hre reng turin min chah lawm lawm mai a. Howmwork ti tha leh tha lo kar chu a hla dawn a ni tih min hrilh a ni. Kan Thupui Kha ‘Kei min koh tawh chuan Lianhnuna ni lovin Lal Isua in mamawh tihna a ni zawk,’ tia bul tan a ni bawk a. Kan subject thupui ber pawh ‘|halaite Mamawh Isua’ tih a ni. Sakhi chul ram fan thuak ila 22.2.2016: Zing dar 8 chiaha thleng tawhte chu kan Speaker tur Saya John Lianhnuna leh a thian chuan an lo thlen khalh diam tawh a. Thutak ho leh Wesleyan Kohhran hrim hrim hi hun tiam pelh hnua thlen hi tlainaah kan ngai lo a, tlai kan intih pawh hian ‘Ka ti tha a nia,’ tihna angah kan ngai tih hi Speaker chuan a hriat tawh tho kan ring a, insawi thiam kher kan tum lo ang. Member kal thei lo hnih khat tih lohvah chuan kan kim thawkhat viau a. Devotion hman a ni a. Breakfast kan ei fel hnuah Class tan nghal a ni. Kan Speaker chuan ‘Baal hmaa thingthi ngai lo mi-a inchhuah,’ chu a thupui ber a. Chumi tur chuan ‘a bul thut(foundation) atanga kan uluk a ngai a ni,’ tiin Mihring tri-cotomy(then thum) leh di-cotomy(then hnih) chungchangah lut chhovin mihring thlarau, rilru leh taksa neia siam kan nih dan ah min tan pui a. A khat tawkin zawhna min zawt fiam a, a zawhna pakhat, ‘Khawiah nge i thlarau a awm?’ tih phei chu chhan a har kan ti tlang hle a. ‘Rilru’ lah nungchate neih ve ang a ni si a. Chutiang chuan min chhaih, min tlankhalh a, a subject ah a tui bawk a, kar khat chhung pawha a sawi zawh sen loh chu ni 1 ah min lehlan pui tumin thaw la lo lekin min hrilh a. A hah a, a inpum pek a, a infit hle mai. Joh. 14:6, thua Lal Isuan, ‘Kawng leh Thutak leh Nunna’ a nih thu a sawi hmanga mihring thlarau, rilru leh taksaa inkungkaih dan luh chilhin hun tawi te ah, kim takin min fan pui a. A thahnemngai rawl pawh a tha thak thak hle. 11:30: Tuk thuan kan ei hnuin dar 1 ah class kan tan leh a. Kan Subject kha chhunzawm zelin ni 1 Camping kham awm loh tak kan hmang zo a. “Thutak hriatnain bawih min ban a, Nunnain kan damlai hringnun mamawh chakkhai engkim min pe tih chu chu a thu tlangpui a ni a tih theih mai ang. ‘Kawng’ a nihna zawn erawh duhthusamin a chhu na hman ta lo niin a hriat a. Mahse, Rom. 12:1-3 thu hmangin ‘rilru kan ti thar reng tur a ni a, a tih thar dan chu Bible chhiar, |awngtai, Inkhawm, Fakhla ngaithlak,’ tih leh a dang chi li nga vel thupui pawimawh tak tak, hrilhfiah thui viau loh pawha kan hriat mai theih tur chi a chhawp chhuak a. Gal. 5:17-24 thua Tisa thil tih leh Thlarau Rah te chu luh chilhin Rom. 12:1-3; thu ang hian ringtuin khawvel dan anga awm lo va, tisa dan zawm hek lova, rilru tih thar fo chu tih makmawh a nih min hrilh thleng hman a ni. Khati khan a tlangpui chu kan thlir zo a. Hun leh hmun renchem thuah duh tawk ila. ‘Thlirletna’ a nih angin duhthawhna lai leh a inhampelhna lai han tar lang ve nial nual ila. Kan thiam phak bak erawh inbeisei lo ila. Thupui a thlang fuh lo Kan sawi tawh ang khan ni 1 Camping kan ni a. A kotute lah a hmaa a lo chul nel tawh sa te kan ni hlawm a. A thuken kal lam haw lam lo hmelhriat tawh sa te kan ni hlawm. Chutiang kan nih avang chuan WY hruaitute tana hriat makmawh tur tunlai khawvela Kristian te tidazat thei Relativism chungchanga Humanism, Materialism, Postmodernism, Positive thinking leh Atheism lam te min hrilh bengvarin chumiin thalaite nun a nghawng nat zia te, thalai te zinga hri leng mek Depression chungchang inhmawrhmuhna lam te hi min thlirpuiin min hmelhriattir se chuan ama tan pawh a hahdamthlak deuh ngei ang a, chhiar zau lo ve tak takte tan hian a manhla ngei ang. A chhan chu kar khat chhung zet a sawi pawha a sawi zawh sen loh a Thuken chu ni 1 ah min hrilh zawh hman a tum ta kha a ni a. A duhthawh si, a tawngkam neihin a funkhawm hneh zo lo, pelh rem rum, phuai luai deuhvin kan zir phah a. Ni 1 chauh hun kan hmang dawn tih hre sa renga thupui dang a thlang lo kha a fuh lo hle mai. A thuken kha nula ni se, khami ni atan kher kha chuan khawte nula inchei tunlai tum, hmai paw phet phet, ke lam khawro bal khak nguai a anna lai a awm. Tun hnuah ni 1 Camping kan nei leh a niha amah bawk kan sawm leh a nih chuan thupui thlan rawn thiam tawh se a duhawm hle. TMEF Vs GEMM hian a rilru a kap deuh bawk niin a lang. Eng emaw chang phei chuan ama min zirtir ber Thlarau Rah chu a ti-rah hram hram a ni ber e. A kuang lova hun ang deuh a ni a. Member kal zingah khan khatiang lam rawngkaia thu sawia beng thlep hnawp tur kan awm tih a veng thawng lo khan hmabak a la ngah ve neuh neuh zia a tilang viau. Nge, arpa chan chan lai a ti zawk pawh a ni mahna! Bible chang a tlawh chhante a belh chian dan a fiah fel tawk lo. Pakhat chauh han sawi ila. Chu pawh chu pawi tak a ni. Gal. 5:17-24 chhunga Tisa Thiltih leh Thlarau Rah hi a sawi zel dawn a nih chuan a zir chian, a then fel, a thliar thiam a duhawm ang. Thlarau rah te leh zel pawh ‘ti rah thin turin’ min zirtir mai mai si a. A chiang love lalte va lam leh rawh tih zawng zawng kan chang zo alawm le. ‘A ram leh a felna’ tih thu ah pawh keini ang duang ai chuan ‘a lalram leh a felna’ tia sawi dik thei tur zawka ngaih a ni a. Chutih a hnekin ‘A felna’ tih pawh ‘Krista a ni’ te a ti ta mai mai a! Pathian ‘felna’ chu ‘Krista a ni’ tihte chu ‘a theih ve tho alawm’ tia sawi mar ngai chi a ni. Thutak a varpawh dan chungchangah ngaihtuah a titam deuh. Amah ngeiin, ‘Thutak ka harh hlim chuan engkim hi tluang pur pur, hmuingil vek turah ngaiin ka kut pawh ro that khawpa pharin malsawmna beiseina nen Lalpa hmaah ka thingthi a...’ a ti a. Thutak harhna chan leh lei lawmna hmuh inbeiseina hi engtik atang khan nge a lo pian tak le? Thutak varpawhin chutiang beiseina kan nei ngai reng reng hlei nem! Thutak varpawh leh lei lawmna hi a kal rual thei lo. ‘Lei lawmna an tan a vul ve si lo,’ tih ang kha a ni zawk e. ‘A lawmna chu Lalpa danah a ni zawk a,’ tih ziak famkimna hi hringnunah a chanin nitin kan chang thin zawk asin. Engtin nge lei lawmna tur anga ngaia Thutak varpawh chu a lo ngaih theih bik reng reng ni aw? Ni e, he zawhna hi a thupui min luhpui danah a fiah ta chiah a ni. ‘Thutak kan harh chuan kan tih ve loh lam Chhandamna chu kan chang a,’ a ti thul. ‘Chhandamna chan chu Thutak harhna a ni a,’ a ti leh vel. Eng aiah hian nge maw ni tunlaia rawngbawltu tho thar deuh apiang maiina Thutak Harhna hi ‘thlarau chhandamna tiat’ vela an rawn hmeh bel tlat zel hi aw? Kan WY zingah hian Thiamchantirna, Tlanna, Piantharna, Thlarau Chhandamna te hi Thutak Harhna emaw ti kan la awm em? Khua hi a va han var har em! Zawh dawra suk tin, tlawng vuaka mat dap, a leh a linga vut tui thlawr bel hi a ni ringawt mai. Thutak harhna kan induhsak avanga kar khat chhung Camping Subject kan lak hian kan thlarau lam tuihal dan leh kan chim chin azirin ngaithlatute hi Thiamchantirna tlangah te, Simna takah te, Tlanna thu ah te, Piantharna thu ah te leh Thutak harhna te an/kan chang thin a ni. Thutak Harhna chan leh Thut mai mai a rawn chawm pawlh a. A zir chian rih chu a la ngai khawp e! Kan sawi pawp thiam lo a nih chuan Thutak puang tura kohna kan chang lo tih hi pawm ve mai thin ila. Tu zirtirna êng atangin nge a lo harh tak le tih te pawh tul lo deuhvin min ngaihtuahtir hial a ni. Evan. Thanpuian pawr tawk tawka, ‘Thutak harhna kan tih kha chu thlâm, la sak zawh loh ang a ni a,” a lo ti vel pang pang te pawh kha min ngaihtuah chhuahtir hial a ni. Lei lawmna leh hlawknate hi ringtu tan beisei tur a ni tih hi Evan. Thlamuanthara thu rawn put darh a ni a. A mût kai tawhna chin chinah chuan a thelha thelh mih rual lohva nasain a kâng a. A seltu apiang kan hmu setanic zui lehnghal vei nen. A thu sawi leh kan Thutak harhna chu eng nge a nih chu kan mimal nun theuh ah hian i inchhut let mai ang u. ‘Tu thu sawi pawh ngaithla ila, a chhe lai paih, a tha lai lak hi ka mimal nih dan a ni hrim hrim a,..thil reng reng a chhe lai hmuh kana a tha lai lak ...’ tih thu te inthlahrung lo takin a puahpui ngam a. Paula tawngkam, “Mihring tihlawm tum ni ila, Krista bawih ka ni lo vang.” (Gal. 1:10c) tih chu amah a inhmehbel tih hriat theih taka sawi nawn sek chunga ‘Pawmrem Thurin’ a pawm zia a aupui tim miah lo hi a inbih chian a ngai! Chutiang ngaihdan pawm ve tur chuan min la fuih zui ta dah a! He Postmodern Idealogy hi chu ani ang em chuan rawn pu darh ve lo hram se ka duh asin maw le! ‘A tha lai apiang pawm, a chhe lai apiang hai der’ tih vel hi chu a lehkhabu chauhvin a awm-Pathian thu buaipuitu tan chuan! Mizo tawng thiam deuh atan a duhawm hle mai. Nungcha, ran, rannung, ram sa, thil nung, mi nung tih chi hi a hmanna zawn a awm vek a. Sawi pawlh awl deuh chu nun, nunna, nung, tih te ring, rin, rinna tih te hi a ni a. ‘Mihring pawh hi ran sa (ram sa takngial pawh kan ni pha lo!) kan nia,’ a tih te phei kha chuan ka hnuk a tiulh! Aw le, duh tawk ang. Min hrut na ngam tura kan rin kan ruai a. Kan rawih angin min hrut na reng a. Mimal thila lak loh tur a nih kan hrethiam tlang a. In chhuahchhalh fiamna piah lamah in nau tatna rawng kai thei chi pawh a boruakin a ken tel angin kan ngaizam a. A hlawkthlak chiah em tih chu kan thlirletna hian a tifiah turah ngai ila. Chutih rual chuan he kan thlir letna hian a hnar a khawng thiang bik lo a. A helh a rem bik lo. ‘Mihring kan famkim lo’ ti chung zela a bu ang thlap ringtu-ah midang chhuah tum tlat pawlah hian a kal nat lutuk hlauhthawn pui vangin a khap sual tur nia a lanna lai kan han thai lang mai a ni a. Intihmualphona a ni lo a. Lalpan rem a tih chuan kan la ruai leh ngei bawk ang. ##

Nitin Nun

by: Suithanluaia(Chalthleng) He khawvel hmasawn zelah hian kan nitin nun leh hun engtin nge kan hman hi mimaltin theuh inbih chian a tulin ka hria. Hei, WY ah hian Bible lamah te, secular lamah pawh zir sang tak tak kan kan ther ve ta fur mai. Chumi rual chuan keini Chin(Mizo) te hian zirna lama kan kal thui ai hian hna thawk lo leh tum lo, awm awl heuh heuh hi kan buk thup ni hian a hriat a. Zirna, thiamna kan neih te hi chhungkuaah te, Kohhranah te, khawtlang ah te, ram tan te kan hmang em? Keini Chin(Mizo)te chu kan em a sang a, thawh erawh kan nei si lo. Kan Tidim uanaute hi chuan hna hniam, hna sang ti lovin an hmuh hmuh an thawk a. Hei tak hi keini WY thalaite hian entawn thei ila a tha ngawt ang. Hna hniam thawh ai chuan thawh loh pawiti lo zawk leh hna nei lova awm tlaw zak lo kan nih chhung chuan kan nihna phu tawka hlut kan hlawh thei ngai lo ang. Bengsika inngaihtuah a hun ta e. Kan biak Pathian hian hna thawk lova awm hi rem a ti lo va, ‘Thawk lo chuan ei pawh ei suh se,’ min ti hial zawk a. Kan awm dante pawh hi Lalpan chiang takin min thlir reng si a. A hriata hriat zawng chuan Pathian thu kan hria a, nunpui khawpa hria erawh kan ni lo a. Nunpui lah kan tlem si a. Kan piangthar pawh hi a hmasak ber ah chhungkuaah kan nun hmuh tur a awm em? Chuan, Kohhran, Khawtlangah te kan ram thlengin; mi hmuha eng turin Lalpan min ti si a. Addict an sawi thin a. Zu leh drugs chauh a ni lo a, kan cell phone te hi kan addict em? I inbih chiang ang u. A tawp berah chuan he khawvel dan ang hian awm suh ula, Pathian duhzawng, a tha leh lawm tlak leh that famkim chu in hriatfiah theih nan in rilru a thara awmin lo danhglam zawk tawh rawh u. Pathian min pek khawngaihna avang hian in zingah tumah in inngaihhlut tawk aliama inngai hlu lovin Pathianin mitin hnena rinna tawk a pek ang zelin fel taka ngaihtuah zawk turin...” Rom. 12:2-3ff; ah a ti a. Kan nitin nun ah Pathian tiha awmin sual kalsan theihna turin Lalpa hnenah i dil ang u.##

Sunday, March 6, 2016

KEIMAHNI

Chaw nghei tawngtai hmang: 27-2-2016 Inrinni khan Director hovin Carmel ah member 18 zet chaw nghei tawngtai hun an hmang a. Tum dangah Biak Inah kan nei thin a. Mi hei zat kan tlin theih tawh lohna hi a rei ta a. Hetianga mi kan pung zawk dawn a nih chuan lehpekah pawh Carmel bawk hi kalin chaw nghei tawngtai hun hmang leh ila member kan pun zel a rinawm. Member te tawngtai Lalpan chhangin kan Kohhran chungah Thlarau malsawmna van dai fim thleng mawlh rawhse! NU PAHNIH THUM THU VANGIN EVAN. THANZUALA RAWIH TUR CANCEL A NI 4-3-2015 LAB meeting chuan WY buatsaih Chhandamna Camping neih tura Speaker atana thlan tawh National Evangelist of The Wesleyan Church of Myanmar Evan. Thanzuala chu duh lovin an hnawl! WY meeting-in a minute tawh confirm mai tura LAB-a hlan chhoh chu, ‘An camping neih tur hi a rem a, speaker hi chu a rem lo,” ti pawl an awm avangin vote lak a ni a, WC National Evangelist Evan. Thanzuala rawih tur chu min cancel sak ta a ni. Khawnvar Editor-in hemi chungchanga WY Director a biak a, thil kal dan vel a tawi zawnga tar lan dawn chuan rûl kaw zentu chu LAB mah ni sela, a hnar hrui chelhtu tak chu Director hnena, ‘Evan. Thanzuala lam lam,’ tia lo ang hlai, nu pahnih thum lai thu hla vang a ni. Nu thenkhat ân hlai vang mai maia WY minute tawh a danglam theih chuan tun hnu zelah a duh duh, a hman hman chawh kawi theih mai mai Department kan ni mai dawn niin a lang ta! Vengpui WY! I puan a kang e! harh rawh, harh rawh, i tlai ang e!

March 2016 Editorial

Good Friday! A chhung thuah hmun a chang ta lo a. Sermon kan ngaihthlak tam tur ber a nih tho avangin thu dang atan hmun kan kian ta rih mai! Mi tih dan lo angin kan kal a. Hriatthiam vek nih erawh kan inbeisei lo. Beisei aia hriatthiam kan niha kan thlirna hi pawm pui kan nih erawh chuan hah man ah kan ngai. Kan inchhi eng zel thei hi mihlim rilru tak a\anga chhut chuan ‘atirtu tirhna’ tih pawhin a sawi theih ang. A chhan chu beisei loh lam atanga ‘inpuanna’ hi a lo thleng a, hma kan sawn zia chu thlatir lamah kan inchhi eng ve tan a nih der hi! He kan WY Khawnvar hi a thlawna sem kan ni. A thlawn hi chu kan hlut thin lo. Chu chu mihring mihrinna pangngai tak a ni. Intinah kan rawn inkhai lutin a thim lai apiang en kan tum a ni a. Eng hua te kan awm hlauh a nih chuan inthlahrung lovin kan chhem hlum mai dawn nia—khawnvar mai a nih hi!