‘Eng Handset nge ka lei ang?’ Hetiang zawhna hi chu, “Ka phone hi a ringtune nen chuan nuai khat leh a chanve a ni,” tih ang deuh a nia. Eng pawh ni sela, chhan tho i han tum teh ang.
A hmasa berin i sum dinhmun hriat phawt a ngai. Kyat singnga bawr vel i nei a nih chuan i em sang thei lo ang a, sawi duah pawh chil per a uiawm mai mai. Kyat nuai khat singnga vel i nei a, a tul dan azira singnga la belh leh thei tur dinhmuna i din chuan kan zawhna hi chhang duah pawh ni ila, chilper a pamhmai thlawn lutuk lo ang.
Kan rualawh tlanna ber chu tawh tawlh(touch) theih ni ngei se, hlai hlup si lo a ni ngei ang. Chutiang a nih chuan eng le khawle ‘Andriod OS’ hmang chin kan mitthla ran ang a. Camera tih tlak ve deuh, video pawh en theih, internet browsing nan pawha duhthusam kan em thei ang. A nih leh, Andriod OS hmang ah chuan eng Brand nge kan han melh leh ang? A lar chin leh a tlanglawn chu Huawei, Samsung, HTC, Oppo, Vivo leh Sony Xperia te an ni a. Lenovo leh Apple te hi chu kan cheng hum let let let thawk man man chin an nih avangin sawi lohva lumah dah rih ila.
‘Andriod hi chu a battery a tlo lo an ti a,’ tiin a enga mah hmain i nawi tan dawn a nih chuan dawr thlen hma khan inngaihtuah fim hmasa ang che. Battery tlo, Signal man tha, aw fiah, daih rei tur i duh chuan ‘chatuan pheikhawk’ kan tih thin ang deuh, thlan tur ‘Java OS’ hmang Nokia, Sony Erickson te pawh a awm. A tlo tih zawngah chuan tlo tak an ni. Rukru laka ven hranpa pawh a ngai lo. Naupang ninhlei pawhin an khawih peih lo. Tar neih ang deuh a nia. Tumahin min zar buai lo hrim hrim. Mo lawm nia thawmhnaw hlui inbel a an deuhna chin a awm tih erawh hria ila. Chutiang chu i pawisa lo a nih chuan tirawh, inkhâp buai a ngai lo, i sum zatve kha a chen ham ham theih.
Andriod OS hmang eng device pawh battery chu a heh tlangpui a. Fuh lo laileng pawh a awm tho mai. Chuvangin, mi hman tlanglawn leh a spare part tam apiang kha thlan a fuh ang. Thawmhnaw lei anga lei tum tlat, mi hman vak loh, hriat pawh hlawh mang lo thlanga ngaih titha pawl hi kan awm a. A fuh lohna chu a spare part hmuh a harsa thin leh ‘palh’ awm changa khawih a khirh ta tlat zel kha a ni.
Kan simcard hman tur duh thlan hmasak a tha. Ooredoo i hman dawn chuan internet khawih a nuam ang a. Ram dang atanga phone call i dawn pawhin inbiak pawh a nuam ang. Chumi rual chuan sum thuni nu a ni. MEC simcard hi chu i kawl a nih pawhin a tihral dan zawng vat rawhsumdawnnaah i tangkaipui viau te a nih loh chuan. MPT hi chu zu ngawlvei kawl ang deuh a nia. Thun ve reng a ngai a, a chhawr hleih theih meuh si lo. Tih fuh tum chuan kan han lawm viau a, kan lawm loh ni a tam zawk. Beisei tisang tawkin eng emaw min rawn hmawrhmuh zauh a, vanneihpui erawh chu a har zek a. Telenor hi tleirawl ngaihzawn ang deuh a ni a. Beidawn san mai dawna beiseiawm si, innghah nana hman tak tak dawna tawm im leh ang reng siin nunphung tikhaihlak tawkin a awm roh a. Hetiang a nih avang hian Andriod Device i hmang dawn a nih pawhin eng ang simcard nge ka hman dawn tih inhre chiang hmasa ang che.
Man in ang rau rauvah pawh Andriod OS Version a inang lo leh a. A version chu a lo berah 4.1 chung lam ni thei tal se a tha a. Internal memory 4GB chin, RAM 1GB chung lam melh kual hram hram a tha khawp mai. Hetiang tawhtawlh kan hman tak tak chuan ihe lovin Game kan khel duh ngei ngei thin a. Kan sawi chin ho aia hniamah chuan a nih dan tur pela kan hman hian phone in a dawl ta thin lo a ni. A nih dan tur dik chiaha hmang tur lahin mi azawnga chimlim leh khirh kherkhiap nih a ngai si a.
Naupang nawi kawl, hau phal si lo kan nih chuan HTC emaw, Xperia emaw hi em ila. Chutiang kawl lem lo, zawng lai kan nih chuan Camera hman tlak apiang kha thlang mai bawk ila. Camera ah na na na chuan, leh kan pawisa sawi zatin a lei phak chinah chuan Oppo leh Vivo, leh Samsung hi a thlan tlak khawp mai. Oppo leh Vivo hi kan pawisa sawi zatin a lei phak chin ho ah hian buaina buaipui tham ang reng tak a awm. Chu chu file(thlalak, video, mp3 etc,..) a bo duak thin hi a ni. A bo loh dan hrang hrang sawi leh kaihhruaina awm mahse, awmzia a nei pha tak tak rih lo a ni.
Kalaymyo biala kan hman atan chuan mimal takin Samsung ka fak a. Kan lei zo a nih chuan Sony Xperia eng chi pawh insawihmuh tlakah ka ngai bawk a. Chumi a nih rau rau chuan Lenovo hi Camera uar tan chuan Sony Xperia nen buk fe tham niin ka hria. Kan tlin fe a nih pawhin Apple Device chi reng reng chu ban loh a tha.
I bank account a ful thak tawh emaw, thuruk tawpkhawk thup tur i nei emaw a nih pawhin Apple Device eng chi mah hi hmang duh chuang suh. “A man a to si a, eng nge a danglamna?” tih zawhna hi chhang dawn ila keini ang tualpa lung mawl, bai dai baw harha harh ve naran tan chuan chhan thiam a har khawp ang. A kawm(Hardware) lah hi thlawhtheihna thir hmanga siam a ni tih a ni a. A man to uchhuak na bak a danglamna leh a bik riauna pawh he luikam atang chuan kan pawh pha ve lo a ni ber awm e. A security that zia that zia lah chu a siam chhuaktute ngei pawhin an khawih chhe thei tawh lo! Chutiang chu a nih avangin, i neihin a tlin em avanga naupang lawmah i ti emaw, thil man to uchuak kawl ve hrim hrim hi dam man awm nia i ngai te a nih ngawt loh chuan Apple Device hi chu midang thlan atan dah hmiah rawh.
Eng pawh ni sela, kan inpuih theih tawk engmah tham lo te hi tu emaw talin ngaihtuah thiam nana a lo hman ve hlauh chuan a lawmawm ngawt ang.
Posted via Jedidvena
0 comments:
Post a Comment