May thla Nute Ni Pual

Nausen chuan Pa Pathian chu,
“Khawvela min tirhthlak i tum thu ka lo hria a. Hetianga chak lo leh derdep hian eng nge ka tih ang le?” tiin a zawt a.
“Duat taka enkawla venghimtu tur che i tana ruat sa Vantirhkoh chuan engkim zirtir tur chein a nghak reng tawh zawk che asin.” tiin Pathian chuan a chhang a.

Nausen chuan bangbo hmel takin,
“Vanrama i bula ka awm pawh hian engmah tih theih ka neih loh hi— hlaa min awih changa ka lo seih thin tih mai loh chu?” a han ti he haw a.  Pathian chuan,
“I Angel chuan zaiin a awi thin chein a nui hmelin a seih tir thin ang che. Chu bakah, a hmangaihna mak tak ah chuan muanna hmuin i hlim em em ang.”

Chutah, nausen chuan,
“A nih leh mihring tawng ka thiam si lo a, engmah ka va hrethiam awm lo ve?”
“I Angel chuan i la hriat ngai reng reng loh tawngkam mawi leh tha, ngaihthla la leh dawnsawn nuam te chu a zir thiamtir ang che a. 
I tana zirtirtu tha leh ngaihawm ber a ni ang.”

“Biak che ka duh hunah engtin nge ka tih ang?”
“Nangmah vengtu Angel chuan tawngtai dan pawh a zirtir ang che.”

“Chhan chhuah ngaiin ka awm pawh a ni mai thei a?”
“I tana ruat sa Vantirhkoh chuan i tan eng pawh a huam ang. A nunna hial hlan ngai dawn pawh ni se.”

“Mahse, ka hmu thei dawn tawh si lo che a, ka khua a va har awm ve.”
“Nangmah vengtu i Angel chuan ka chungchang a hrilh chein ka hnena i lo thlen theihna kawng a kawhhmuh dawn che alawm, bakah ka hlat ngai dawn reng reng lo che.”

Chutih lai tak chuan Vanram chu a reh thuap a, Khawvel lama kohna aw chu a hriat veleh nausen chuan hmanhmawh takin,
“Aw Pathian, tunah ka kal a hun ta si a, min enkawltu tur ka Vantirhkoh chuan hming a nei em, min hrilh teh?” a ti a. Pathian chhanna chu hei hi a ni.

“ ‘Ka Nu,’ i ti  dawn nia.”

Read More

Maksak May 2016 Khawvela Bible Lian ber [World's Largest Bible (Waynai)]

Thil mak tak tak hian Mit leh Beng a titlai ve alwm le.  Ka'n chhawpchhuahsak leh mai teh ang che u.

Kum 1956 khan, ACU Library (khatih lai khan ACC tih a ni) chuan Fort Worth-a Rosen Heights Church of Christ hnen atangin thilpek a dawng a. Hei hi he Library History-a thilpek (donation) lian ber a ni ta reng a ni.

Los Angeles, CA-a cheng Louis Waynai chuan kum hnih lai a buaipui hnuah, kum 1930 khan King James Bible hi a siam zo thei ta a. He Bible hrawl lutuk siam tur hian darkar 8,700 aia tam hun a hmang nghe nghe a ni. Mr. Waynai chuan Tual chher rubber stamp press-in Bible thute chu a print ta a ni.

Chhuata daha han keu pharh hian, Waynai Bible hi 43.5 inches-a sang leh 98 inches laia hlai a ni. Khup thawka a chhah lam chu 34 inches niin, phek (pages) 8,048 lai a awm a; 1,094 pounds ( 496.230053) laia rit a ni.

Tunah hian Oak thing leh glass-a siam chhungah dah that a ni a. Chu bawm chu Willa B Patterson (34) khan a present a; mahse, bawm (case) siamtu chu Jim Mitchell ('69) niin, kum 1989-a a siam kha a ni.

He Bible hi dah sawn kual chhen turin Section 31 laia thendarh theih tura siam a ni a. Kum 1956-a ACU ah a rawn luh atang khan, vawi duai lo dahsawn a ni tawh a— dah sawn kual vel pawh thil harsa tak a ni. September 2006 khan, Gaines B. Stanley Sr. Theological Reading Room-ah sawn phei a ni nghe nghe.

Mi tam tak chuan 1800 Macklin Bible zawk kha Khawvela English Bible Lian ber niin an ngai a. chu chu Volume 7 lai print a ni a, feet 2-a sang leh 130 pounds (58.967008) laia rit an ni theuh bawk. Macklin hi Printing Press atanga siam chhuahah  chuan Bible lian leh hrawl ber a ni mahna. Mahse, a size han en reng atang hian Waynai Bible chu a tia lo hle thung a ni.

He Bible hrawl tak hi khawih chet ngun atan chuan a tlo lo hle na chungin, Brown Library's Bible Collection-a khawih chet ngun tak a ni lawi si a ni.##

Read More

Ngaihnawm May 2016 Sem darh chu Pun Leh zualna

A Kohhran azawng chuan Roman Catholic ruhkawl,  football khawvela par chhuang mek Cristiano Ronaldo-a chanchin hi lo hre ve teh.

“Ka hlawhtlinnaah hian ka thianpa Albert Fantrau-a hnenah lawmthu ka sawi lo thei lo. Youth club pakhata ka khelhpui thin a ni a, player zawng tura Sporting Lisbon mi leh sa ho an lo kal khan, min inkhelhtir chhin ang a, chuta goal thun tam ber chu an Academy-a zir tura an lakluh tur thu min hrilh a. Kha match ah khan 3-0 in kan chak a ni. Hmahruaina goal ka thun a, Albert-an a hnu lawkah a tauh goal ve leh a, 2-0 in hma kan hruai a. Tichuan, hun tawp dawnah Albert-a chuan ball tha zet mai a hmu a; amah lo thlawp turin a bulah chuan ka tlan a; keeper a bum a, a tlanpel a, a tih tur awmchhun chu goal ruaka thun chauh a ni tawh. Mahse, thun ta lo chuan ball chu min lo pass ta daih mai a; a mak ka ti lutuk. Harsa lo takin goal ruakah chuan ka thun ta a.  Academy-a lut tur chuan thlan ka ni ta a ni. Inkhelh ban veleh engvanga khatia ti nge a nih tih ka zawt nghal a, tawi tein tihian min chhang,“Kei aiin i thiam zawk a i phu zawk e,” tiin.

Kum engemawzah hnuah nikhat chu chanchinbumi hovin Ronaldo thusawi hi a dik leh dik loh finfiah turin Albert Fantrau-a chenna in chu panin an va zawt a. Thutak a nih thu leh a football career pawh khata tanga a tawp tak hlauh thu te leh hnathawh nei lova a awm zui tak thuin a lo chhang a. Chanchinbumi te chuan, “Chutiang a nih chuan in ropui tak i nei a, lirthei man to tak tak i nei bawk a, i hausa em em bawk sia, engtinnge heng zozai te hi i neih theih si?" tiin mak tih hmel takin an zawt leh a.

Alberta chuan a thianpa chu chhuang tih hriat takin tihian a lo chhang a, "Cristiano min pek vek a ni e,” tiin.##

Read More

May 2016 Theology Huang NGAIHDAM THEIH LOH SUAL - THLARAU THIANGHLIM SAWICHHIAT

by: Dr John Hlychho

1. THUHMAHRUAI
Pathianin, mihring chu a tihsual leh a sualna zawng zawng deuh-thaw a ngaidam vek thei a, ngaihdam theih loh erawh a nei a, chu chu “Thlarau Thianghlim sawichhiat” hi a ni. Hemi chungchâng hi Lal Isua’n a sawichiang hle a, “Tih tak meuhvin ka hrilh a che u. Mihring fate hi an sualna zawng zawngah leh Pathian an sawichhiatna kawngah engah pawh an sawichhiatnaahte chuan ngaihdam an ni ang; Tupawh Thlarau Thianghlim meuh sawichhia erawh chuan engtikah mah ngaihdamna a hmu lo vang a, chatuan sualna kawngah chuan thiam lohvin a lo awm zawk ang" (Mat.12:31, Marka 3:28-29) tiin.
Thlarau Thianghlim Sawichhia tih laiah hian “SAWICHHIA” (Grk. blasphemia) hian – tawngkam leh Thiltih-a nasa taka lan chhuah-tir a kâwk bawk a ni. He Thlarau Thianghlim Sawichhiatna hi Thlarau Thianghlim avanga Harhna a thlenna apiangah sawi a hlawh a, a Hlauhawm zawnga sawi leh a Mam zawnga (hlauhawm vak lo lam zawnga) sawi an awm ve ve thin. Pathian Thu thiam, Bible Scholar zingah pawh Ngaihdân leh Sawifiah dân a inang lo. Hemi chungchang hi tawitê-in kan khel dâwn a ni.

2. BIBLE SCHOLAR ZINGAH NGAIHDÂN A PHIR NASA!!
He Sualna hi a serious êm avangin Bible Scholar zingah pawh Pawmdân a inang lova, Ngaihdân 3 a awm nghe nghe a ni. Tawitêtê chauhvin lo sawi ila.

NGAIHDÂN 1-NA PAWMTUTE chuan, “Pathian meuhvin a ngaihdam theih loh sual chu a awm thei dawn emni? Ziak dân emaw, Tawngkam hman emaw, Source (thu lâkna)-ah dik tâwk lo a awm a ni zawk lo maw?” an ti a.

NGAIHDÂN 2-NA PAWMTUTE chuan, “Hetiang sualna hi chu, a hring ahrana Lal Isua khawvêla a len lai chauhvin a thleng thei a. Lal Isua a awm tawh loh hnu-ah chuan, Kohhran hmasate zingah pawh sawizui a hlawh tawh lova, Bible bu dangah pawh ziak lan a ni tawh lova, hmuh tur a awm tawh lo” an ti ve thung.

NGAIHDÂN 3-NA PAWMTUTE ve thung chuan (Evangelical Scholar zingah a ni deuh ber), “He thu hi thu pawimawh leh serious tak, tunlai hun thleng pawha hman tur (applicable till today) a ni a. Lal Isua khawvêla a lenlai hunah chauh hman tur a ni lova, Lal Isua lo kal leh hmâ zawng, Thlarau Thianghlim-in khawvêla hna a thawh chhung chu he thu hi hman rêng tur a ni (valid till the second coming of Christ)” an ti ve thung a ni.

3. LAL ISUA SAWINA DINHMUN (CONTEXT OF THE ISSUE) HIAN A TICHIANG HLE
Bible thu tam tak hi, a Ziak hunlaia thil awmdân leh mite dinhmun (the exact context of the life of the people) atang lo chuan, Thumal pakhat emaw, thusawi thenkhat (stury/sayings) hi chu a fiah har khawp mai. Chuvangin, Bible thu-te fiah taka hrechiang tur chuan, “TEXT, CONTEXT AND APPLICATION” (A TAWNGKAM, ZIAK HUNLAIA THIL AWM, ENG ATÂNA ZIAK NGE) tih hi Bible Chhiar leh Zir leh Hmanchhuah (read, study, apply) dawn hian hriat rêng leh ngaihtuah fo a tul a ni.

Hemi chungchang hi ka Article/Post “PATHIAN THU ZIR HI I UAR TEH ANG U” tih-ah khân ka ziak nual tawh a nih kha. Entirnân pakhat lo lachhuak ila. Thuthlung Hlui-a Thlarau Thianghlim sawina tawngkam leh Thlarau Thianghlim aiawh-a hman thin kan hriat-lâr êm êm chu, Heb. ruach a ni. Heb. ruach hian kawh-tum hrang hrang a nei thei a, e.g. Thlarau Thianghlim, thaw, thli, etc.
Tichuan, Hebrai tawnga “ruach” tih
Thumal (word) atang ringawt chuan, a eng ber nge sawi a tum tih a hriat theih ta lo a ni. Hei hi a chhan ber chu, Hebrai miten Thumal or Tawngkam bungrua an ngah tâwk loh vang a ni ber awm e. Hetah tak mai hian, Hebrai mite Thuziak dân leh Thu sawi dânah chuan, an sawina dinhmun leh an sawi laia thilthleng atangin, kha thumal (word) kawh-tum ber kha a hriat theih ta thin a ni.

Chuvangin, Bible thu (thumal or sentence) tam tak hi chu, a hmâ leh a hnu-a thu awm-te chhiarin a fiah nghal mai thin.
Lal Isua’n, “Ngaihdam theih loh sual – Thlarau Thianghlim Sawichhiatna” chungchang a sawi lai dinhmun (context) hi lo en zui ta ila. He thu hi, Matthaia leh Marka’n an ziak chiang ber a. Hemi kaih-hnawih tho, Mahse, Ngaihdam theih loh sual – Thlarau Thianghlim sawichhiatna tih tellovin Dr.Luka’n a ziak ve bawk (Mat.12:25-32, Mark.3:20-30, Luk.11:14-26). Chanchin Tha Bu 3-ten an sawi zawng zawngah hian, Ringtu leh Ringlotu nun-a Thlarau Thianghlim Hnathawh a ni vek a ni. Dr.Luka hian Ringlotu nun-a Thlarau Thianghlim Hnathawh, Sual kalsan leh Pianthar leh Lal Isua Lal leh Chhandamtu-a pawm pawimawhna chungchang nên a rawn sawi-zawm a (Luk.11:24-26).

Matthaia leh Marka erawhchuan, Ringtu (Puithiam & Pharisai & Lehkhaziaktute) leh Ringlotu (Ramhuai-pai) ten Thlarau Thianghlim an hnar theih dân leh Thlarau Thianghlim thiltihtheihna an chan theih dân (ramhuai hnawhchhuah) nên an rawn sawizawm thung. A tawi zawngin sawi ta mai ila. Matthaia leh Marka hian, Thlarau Thianghlim Thu-ah hian, Thil Pawimawh tak 2 an sawi a -

(1). Ringlo miten Thlarau Thianghlim thiltihtheihna an chan theih dân leh, anmahni tibuaitu (awpbettu) Ramhuai hnawhchhuah sak an nih theih thu an sawi a.

(2). Ringtuten (Sakhaw Hruaitute - Puithiam, Pharisai & Lehkhaziaktute) Thlarau Thianghlim sawichhiaa Pathian Ngaihdam theih loh dinhmun thlenga an awm theih dân an sawi bawk a ni. Hei hi a chianna êm êm chu, Lal Isua’n Thlarau Thianghlim Sawichhiat chungchang a sawi Ngaithlatute (hnialtute leh Lal Isua awih lotute leh Setana hnathawh anga puhtute) hi Sakhaw Hruaitu (Puithiam, Pharisai & Lehkhaziaktu)-te an ni tlat a ni.
(Awm zel tur)

Read More

Bible Zir Puitu May 2016

Bible-a thu inziakte hi Pathian thu kan ti a. Pathian thu sawiin kan sawi a, a ngaithlatu pawhin Pathian thu ngaihthlakin kan ngaithla a. Kan bengin kan hria a. Hetah tak hian ‘hria’ hi kan hriat a ngai. ‘Rinna’ hi Thuthlung Thar fate tan chuan Sabbath serh leh Serhtan tluk a ni a. ‘Rinna lovin ama lawmzawng mi’ a nih theih loh a(Heb.11:1;), ‘..eng pawh rinna lova tih chu sual a ni...’(Rom. 14:23b;). Mahse, ‘,..mi zawng zawngin rinna chu an nei vek si lo,..”(2Thes. 3:1d;). Rom 10:17; ah chuan, “Chutichuan rinna chu hriatna avangin a lo awm thin a, tin, hriatna chu Krista thu avangin a lo awm.” tiin a kawng chu min kawhhmuh a. Krista ‘thu’ chu hriat a ngai a. Kan hriatna hnar atan Bible hi pek kan ni.


Bible thu hi a thawnthu hriata hriat a awm a. Chutiang hriatna chuan nunna a thlen hauh lo a. Mi a tichapo zawk thin. A awmze kaihlek a awl hle a. Fimkhur pawh a ngai. Kan ngaihdan thlak vek theitu a ni a. Nunphung leh puithuna zawng zawng pawh a thunun vek thei. A awmzia kan hriat chu kan pawm dan siamtu, kan rin dan nemnghettu a ni. Mihring chu kan rin anga nung kan ni a. Kan thurin chu kan nunphung kaihruaitu a ni.


Kan ramah hian ‘rul vun inlip’ ang piangthar an tam hle a. Chu chu ‘pianthar awmzia’ an hrilhfiah danin a rintir rah chhuah a ni. Rul chu a vun inlip vangin vun thar pu mahse, rul a nihna a bo chuang lo. Chutiang chiah chuan ‘si-pi-ring’ nem beh tlat anga lan that theih dan tura nung hram hram pawh an tam mai. Tlin loh china a sawp chu nasa tak a ni!


Kohhran hi kan ngai pawimawh tur a ni a. Kohhran ngainat hi kan inzirtir tur pawh a ni. Kohhran kalphung leh tih dan zawng zawng chu Bible pel a nih erawh chuan Isua pawh a hnawk pha hial thin!


Chutiang a thlen chuan Bible ngaihsanna a tla hniam a, Pathian thu hriat chaknaah a tuihal theih loh a, Krista hriatna kailawn rapa kai chho zel tur nun kha a chhuk zawngin min hnuk hniam a, khawvel chhuk bih thinte kha van lam chhoh enin, leia van nun temtu niha lawm thei lo leh he khawvel dan anga awm a, khawvela thil awm hmangaihnaa uirena a hring chhuak a. Thik khawp hiala min hmangaihtu Pathian thikthuchhiatna mei a lo alh chhuak a. Harh chhuah phah nana kan hman loh phei chuan Kristian vui hmui pu pawrh ah a chhuah hial theih tih kan hriat a va pawimawh em!##

Read More

May 2016 Thuziak International level

by: Buanga

Tum khat chu kan thian za hovin topic hrang hrang vawra kan ti ti laih laih lai chuan kan zinga pakhat hian kan Pathian biak dan “worship” hi a international level lo e mai, a ti hlawl mai a. Midang zawng chuan ni kan tih hmel deuh ve mai bawk a. Kan tin hnuah pawh ka rilru ah a riak reng a. Eng ang hi nge ‘Internaltional level worship’ chu aw, tih zawhna chuan ka ngaihtuahna a luah khat a, thian dangte khan an hrethiam chiah bik emaw chu tih zawhna te chu ka awm chhungah a thum tluk tluk ta mai a.

Ka ngaihtuahna a luah hneh em avangin ka ngaihtuah zui zel a. A tawpah chuan Bible hi Kristiante innghahna bulpui ber a nih kha maw tiin ka phak ang tawkin ka rilrua zawhna awm tlat chhanna zawng chuan Bible ka keu ta a. Chuta ka thil hriatthiam takte chu hlawkpui kan awm ve beiseiin ka han thai lang ve dawn a ni.
‘Worship’ lama kan harh a, kan phur thar ve tial tial hi a hlimawm kawng khat viau a. Bible lama mithiam pakhat ka kawm chuan, “Kan thil tih reng reng hi Bible nen a inmil nge mil lo tih kan chhut ngun a \ha, Kohhran thil tih ngei pawh ni se,” a ti a.  Atir ah chuan Kohhran chu a sual thei dawn em ni kan ti a; mahse, a chhunga awm ho hi famkim lo rual te te kan nih han chhut chuan chu pa thusawi chu a ti awi awm phian a.Chuvangin, kan worship chungchangah pawh mihring mihrinna a tel nual thei dawn a ni tih phat rual a ni lo ang.

Pathian fak (worship) hi Bible-in a lo dah thu pui khawp mai tih hmun tam takah min hrilh a. Mahse an worship leh kan worship a in ang em tih han khaikhin dawn chuan (Thlarau Thianghlim hriattirnain) Rom 12:1-2; -a Paula thu sawi, “in rilru chu a thar a tih dang lam in lo awm zawk rawhse” tih lai hi a rawn lar ber phawt a. Hun rei tak chu a ngaihna ka hriat loh thu a ni a, tunah chuan ka varpawh ve det detin ka inhria. Kan pianthar hian thlarau lam ah chauh kan piang thar a ni lo a, kan duhna (kan rilru) pawh hi a lo danglam zo ta hi lo ni rengin. Ringtu piangthar tawh, mahse,  rilru a thara tih danglama awm si lo hi kan tam tawh viau lo maw?

Hmana kan pianthar hmaa kan duh zawng kha hman ang thovin tunah pawh hian kan la duh hleuh hleuh reng tho em?(Pathian thu in a sawi chen zawk a ni ka tih tum ni).
Kan fakna (worship) ah hian Pathian a cheng nge, Kan fakna ah hian Pathian kan chentir nge kan ti cheng chawp zawk? Kan biak Pathian hi hman ata lo awm tawh tun thlenga la awm a ni a,  a tun lai teh chiam lo a ang!

Kum sanghnih dawn lai liam taa a pek tawh Bible pawh hi tun thleng a la ring a, paih leh belh a phal der lo zu nia. Pathian tha tak mah ni se Pathian ti kher kher tak a ni ve tlat thung. Chuvang chuan tehna leh thupek pawimawh a tih zawng zawng chu kan Bibel-ah hian min lo pe vek a. Chung zinga pakhat chu fakna (worship) chung chang a ni a.

A duhdan ah chuan “thlarau leh tih tak zet” tih hi a ni. Kan fakna (worship) ah te hian Pathian thlarau hi a cheng nge mi tih dan (style) kan zir kual mai mai zawk? Kan worship hian mipui tihphur tur chu ni mah ila, a pawimawh hmasa ber erawh Pathian kan fak a ni tih kan theihnghilh loh a pawimawh.

Pathian kan fak a, Pathianin min lo pawl let a nih chauh in mipui phurna dik tak kan pe theih chauh dawn si a. Chutiang a nih lo a, Pathian Thlarauin min tiphur pawh ni lem lova mipui chawh thawh kan tum ve ringawt a nih chuan chu chu thlarau dang (emotion) vel mai mai a ni dawn tihna a ni. Phurna (emotion) ringawt hi Pathian fakna ah hian a tawk mai loa, ‘thlarau leh tih tak zet’ zawk hi a pawimawh a ni. Emotion hi Pathian min faktirtu ni lovin, thlarau leh tih tak zeta kan tih chuan kan Pathian fakna ah hian emotion hian a lo zui mai dawn a ni. “Thutak” hi a hmahruai zawk chu a ni a, emotion erawh a zuitu zawk mai a ni. Mi thenkhat ten emotion atang lo chuan Pathian kan fak thei lo te an lo ti hi chu a lungchhiat thlak tak zet a ni.

Chuvangin kan fakna (worship) ah hian kan in chhut ngun a ngai dawn tak zet tihna a nih chu! Mi tih dan zir kual mai mai kan nih chuan lemchang lek kan lo ni dawn a. Pathian fak tur chuan a pawimawh hmasa ber tur chu Pathian chunga rilru dik put hi a ni. Amah Pathian tihna leh thlarau dik tak atang lo chuan fakna (worship) dik tak hi a awm thei lo. Bible atanga kan thlir chuan kan inkhawmna a ‘international level lo e’ kan tih a nih thin chuan eng atangin nge kan inteh thin tih inchhut hmasak hi chin tawh a tha. Kan worshipna ah thlarau leh tih tak zet a nih chhung chuan miten eng level paw’n min lo teh thin mahse, Pathian thlirdan atang chuan a tha ber a lo ni tho mai (miten thing leh international lo e pawh lo ti mahse).

Kan biak hi Pathian a ni tih i in hrilh nawn fo ang u, tutu emaw khawvel mi pawimawh ni lovin. Kan thinlung leh ngaihtuahna chhungril chena hre fai vek tu a ni. Pathian chibai buktu chuan thlarau leh tih tak zet (thutak) atangin a be tur a ni.#

Read More

May 2016 Khawnvar Sermon 'Penticost'

P E N T E K O S

Pathian Fapa, kan Lal Isuan he Khawvela a lo kal chhan anga kan tan thihna tuara Pa ropuinain mitthi zing ata thihna hneha a kaihthawh leh hnuin a zirtir thlan chhuahte chu khawvel zawng zawnga Chanchin Tha hrila zirtira siam  chhunzawm turin thu a pe a. Amaherawhchu, Pathian Thlarau Thianghlim lo thleng tur chu lo ngaichang rih turin a chah a. Chu Thlarau Thianghlim chu an chunga alo thlen hunah ‘Thiltih theihna’ an nei anga, kawlkil tawp thleng pawhin a Thuhretute an ni dawn tih thu a hrilhlawk a (Tirhkohte Thiltih 1:4-8).


Chu Thlarau Thianghlim, Lal Isuan pek a lo tiam tawh chu a thawhleh atanga ni 50-naah a lo thleng ta a ni. ‘Pentekos’ tih hi Greek tawng 50 tihna a ni a. He Pentikos(Sawmnga) hi ‘thlai thar kut’ emaw, ‘chawlhkar kut’ emaw tih a ni bawk(Exodus 23:16, Leveticus 23:15-21). Hei hian chawlhkar sarih zet a awh avangin Greek tawng hmang Juda hoten ‘Pentikos’ an ti a. He ni 50 ni tak hian Thlarau Thianghlim pawh hi a lo thleng a ni. Lal Isua kha a thawhleh hnu khan a Zirtirte hnenah ni 40 zet chhung chu a la inlar a(T.T.1:3), chuti anih chuan Lal Isua Vana a lawn atanga a ni 10 na a nih chu.

1. A lo thlen dan:
Lal Isuan a Zirtirte hnena Jerusalem chhuahsan lo tur leh Pa thil tiam nghak reng tura a tih thu chu zawmin, Zirtirho mi 120 te chu hmun khatah an awm khawm a(T.T. 1:15); tichuan, Thlarau Thianglim chu an zingah a lo thleng ta a, hetiangin:-

(a) Thawklehkhatan van ata ri, thli-
pui tleh angin a lo thleng phut.
(b) Chu chuan an \hutna in a tikhat vek.
(c) Lei te(tongues) mei(Fire) anga insem darhin a inlar a.
(d) An vaia chungah a chuang theuh
va, Thlarau Thianghlimin an khat vek.
(e) Thlarau tawngtir angin tawng dangin an tawng.

2. A hnathawhte:

(a) Tawng dangin an tawng: Tawng dangin an tawng nuai nuai naa, anmahni tawng ang theuhin an hrethiam lawi si.

(b) Huaisenna a pe:  Hmeichhe hmaah pawh tan ngam lo pa Peter-a  kha a hmuipui pu ber a lo ni ta hial a. Amah mai ni lovin ringtu, Thlarau  changte chu hriatpuitu rinawm ni turin an lo huaisen ta a  ni.
(c) Sual inhriatna a pe: Lal Isua khengbettute chuan hemi ni hian an Sual ani tih inhriain an inchhir a, simin an nun an siam tha a ni. (T.T. 2:13). Simin Baptisma mi tam takin an chang ta (T.T. 2:41).
(d) Thil mak tih theihna leh chhinchhiahna a pe: Lal Isua lo tiam tawh ang ngeiin, Zirtirte chuan thilmak tihtheihna an lo nei ta a, piangsualte an lo dam a, tin, chhinchhiahnate pawh tam tak an lo ti ta a ni. (T.T. 2:43)
(e) Inunauna leh inhmangaih tawnna a pe: Thlarau thilpek lo thleng zinga duhawm em em pakhat leh chu ‘In-unau-na’ ropui tak hi a ni. An inhmangaih tawn a, inpumkhatin rawng an bawl in Pathian an fak hova, an thilneihte an intawm a, hlim takin an awm a ni.
(f) An lo pung deuh deuh: Thlarau Thianghlim hnathawh ropui tak chuan mi dangte a rawn hruai khawm zel a, ni khatah mi sangthum tein ringtute an lo pung ta a ni. (T.T. 2:41).


An Mission
Thlarau Thianghlim an chungah a lo thleng a, thilmak tih theihna te neiin Pathiant huamna an chang a. Chung zawng zawng a lo thlen chhan chu an Mission kha a ni a. An Mission chu ‘Chutichuan kal ula, hnam tina mi zirtirahte siam ula, Pa leh Fapa leh Thlarau Thianghlim hmingah chuan baptis ula, thu ka pek zawng zawng che u pawm turin zirtir rawh u.”(Mt. 28:19-20;) tih hi a ni.
Thlarau Thianghlim lo thlen atanga vawiin thlenga Kohhran Chanchin han thlir vang vang hian Chanchin |ha hril ngaihthah a nih apiangin ‘inthenna’ a thleng thin. Tirhkohte Thiltih bu pawh han bih ila, an neih intawm sem danah an buai pang a. ‘Thurin’ ah an buai zui leh a. Zirtirna dik lovin a chhaih buai leh a. Korinth Kohhran phei chu ‘Thlarau Thilpek’ leh ‘Tawnghriatloh’ chu an inhnialna leh inthenna chhan a ni.

Thil mak tih hi ngaih ropui hlawhna a ni a. Nature pel dawrh super power neia thil mak tak tak tih theih te pawh a chakawm hle a ni mahna. A pawimawh ber, kan damchhan, Kohhran a awm chhan leh Kohhran pawl hova kan tel ve chhan, kan la nun ve tek tek chhan hi Thlarau Thianghlim thiltihtheihna neia nun ni lovin, Chanchin |ha hril hi a ni zawk. Kan tana thia tho leha Pa dinglama thua chawimawia awma khan thiltihtheihna kan nei emaw, nei lo emaw,

“"Lei leh vana thuneihna zawng zawng ka hnenah pek a ni tawh.....in, ngai teh u, kei kumkhuain, khawvel tawp thleng pawhin, inhnenah ka awm zel ang,"” a ti si a.#

Read More

May 2016 Keimahni

‘WY Day’ May 1: Chhun lamah Director Pu Tlanhruaithangan hun a hmang a. Zan lamah Evan. Vanlalvenan hun a hmang ve thung. WY Day hi Local dang tih dan anga ruai siama \heh mup mup hial ve tawh awm tak chu kan ni nain thingpui tui tak leh chhang ruai kan kil ta zawk

WY Camping 9-15. May: Camping rawngbawlna neih kan beisei chu Lalpan a hriak thih Speaker Evan. Lalseiliana kaltlangin min puitlintir a. Kan tawngtai chhannaah kan lawm hle mai.

Thilpek leh thlaichi tuh kawngah pawh Lalpa a inpuang a. Phang lovin Camping hun chhung kan hmang. Kohhranpui leh WWB, Mission Board lamin min phurpui bakah  Miss. Mawitei hnen atangin sum fai Ks. 30000/- zet kan hmu a; Pu Lalrampara te chhungin an Generator chu Camping chhung zawng hman atan an rawn hnatlan tir bawk a.

A hun thu ah hian kan lo ruat tlai deuh hlek a. Chhandamna Camping lut atana kan duhsak bik, ngaithla chak ve tak tak, sikul naupang lam kha an Hostel awm a lo hun ta mai si a; rilru a pangkhing tak zet a ni. An tel lova rawngbawl kan hlen a ngai ta hian hlimna a tikhingbai deuh.


WY Library Lehkhabu Hawh Tam Ber: Kum 2015 chhunga WY Lehkhabu chhuar haia a bu hawh chhuak tam ber lawmman dawngtu chu kan WY Khawnvar Semtu hlui Tv. Lalhruaidika a ni. Kan chhuangin kan lawmpui tak zet e. Kum 2016 ah pawh a dawn leh kan duhsak e.

Chutih rual chuan member dangte pawh tan la ila. Kar khata Lehkhabu pakhat tal chhiar loh hi thil zahthlak ah i ngai ang u.

Kum 1947 -a an rama an kir leh khan Israelte chuan an hnam pa te hnena Lalpa chhechhama a pek, khawizu leh hnute tuia luang ram chu malpui thleng thlenga dai tur vut dur hlirin a khat tih an hmu a. Chutah, tan an la a. Tih tur an intuk a. Mawhphurhna an inpe a.

Chung zinga pawimawh em em mai pakhat chu ‘Kartin lehkhabu pakhat tal chhiar ngei ngei tur a ni a; dam chhungin Lehkhabu pakhat tal siam ngei tur a ni.’ tih an intuk tel hi a ni. Chutichuan, rei lo teah an ram chu khawvela ram changkang chak ber leh hmasawn ber pawlah an chhuah thei ta a.

Kan WY Library ah hian tuna thleng tharte nen Mizo tawng ngeia chhiar tur lehkhabu chhiar makmawh sing khat pawh tling lo kan nei ve a. Kartin bu khat zela kan chhiar chuan i hmel en aiin i titi leh tawngkam a tihtlak ngei ang.##

Report by: Bawiha WY Journalist 

Read More

May 2016 Editorial

May thla chu WY Day hmangin bul kan tan a. Ni hlu bik dang ‘Nute Ni’ in min lo hmuak a. ‘Thlarau Thianghlim lo thlen champha ‘Pentikos’ Ni’ a lo awm leh a. WY Camping rawngbawlna lah tluang takin kan puitlin thei ta bawk a. Englekhawle, tih theih dang kan nei lo a nih pawhin eng emaw bik atana kan tawngtai tam ber thla chu a ni ta reng reng e.

Pathian chu Pakhat chauh a ni a. Thuthlung Thar huna chengte tan Bible hi a inpuanna famkim, rinna leh thil tih tehna dik lo thei lo a ni a. Bible thute chuan Amaha kan dinhmun leh tlanna ni atana min chhinchhiahna chu Thlarau Thianghlim a ni tih min hrilh  a. Chu chu Pathian thu ngei a ni tih hriatna leh rinna chu Thlarau Thianghlim atang lo chuan a awm thei lo a.  Bible chhunga lehkha puan vara khawl ha dum chhut kai phena Thutak inphum varpawhna te hi Thlarau Thianghlim atang lo chuan a awm thei lo tih ka ring a.

Chu Thlarau Thianghlim ngei chu min chenchilhtu a ni tih ka ring a. Chumi avang bawk chuan mihring tlu chhe tawh, siamthar a nih hnu leh Ama lawmzawnga thutak laka hrin a nih hnu pawha lei taksa pengtea tisa chakna lo chhuakin a bawih fo avangin Thlarau chu a tivuiin, a tilungngaiin, a timit hial thei a ni tih ka ring.

Read More