by: Buanga
Tunlaiah keini Mizo Thutak fate, zirtirna hrang hrangin min nuai tan ta! Thenkhatte chu kan hlawkpui viau a, thenkhat erawh min tibuaitu mai an ni thung. Thlarau indona zirtirna lam pawh kan lo hmelhriat ve leh tan a, chu chu Pathian thu lama thanlenna chi khat chu a ni ngei ang. Mahse, eng zirtirna pawh ni sela, kan rinna innghahna Bible atanga teh vek tur kan ni. Beroia mite khan tirhkoh Paula thu sawi leh zirtirna zawng zawng chu tha ti hle mahse, a zirtirna chu Pathian thuah a awm nge awm lo (Pathina thua innghat a ni nge ni lo) an chian hmasa phawt thin a; Paula rawngbawlna pawh a kal tluang hle a ni kha (Tirh. 17). Chu ngei chu keini Thutak fate pawhin kan hriata kan thanharh ve hi a hun tawh tak zet a ni.
Tunlaia thlarau lam indona vawrh lartu zinga a langsar ber pakhat chuan, “Ringtu piangthar thate hi thlarau sual (ramhuai)-in eng emaw ti zawng in a man (ramhuai luh khung) thei a, thenkhat phei chu an aw te hial a danglamin tawng dangte hialin an tawng thei!” tiin a zirtir a. Chu a zirtirna nemnghah nan chuan a tawnhriat a hmang a; Bible hi chu ringtuin ramhuai sual a pai theih leh theih loh zirtirna nemngheh nan leh hetiang chungchang zirtirna atan chuan tling tawk lovah a ngai bawk. Chuvangin, ani chuan Bible ni lovin, a ma tawnhriat (experience) ngei atang leh midang tawnhriat atangte’n leh a counseling-na ah innghatin ringtu hian ramhuai an pai thei a ti hmiah hmiah mai a ni. Tunlai kan khawvelah chuan mi’n huai taka thu a sawi ngam phawt chuan a awih ngam tawk an lo awm leh mai thin a; kan Kristian-na huang chhungah phei chuan hmuh leh hriat tur a tam leh zual! ‘Chumi kum khami kumah Lal Isua a lo kal dawn’ tih mi’n huai tak maia a sawi chuan a awih tawk hi an lo awm leh tho tho thin. Tun hi Beroia mite tih dan kan zir a, eng ang zirtirna pawh nise Bible-a innghat zirtir-na a nih leh nih loh kan bih chian hun hle tawh a ni lom ni?
Kan tawnhriata kan innghah lutuk chuan, sakhaw dang ho angin bumin kan lo awm ve anga, kan danglamna a awm chuang lo vang. Kan Bible hi kan thurin leh thiltih tehna diklo thei lo a ni. kan tawnhriat ngei pawh Bible hmangin kan teh thin zawk tur a ni. Kan Bible hi khawvela kan awmchhunga Pathian duh dan leh Amah kan hriat chian theihna a ni. Chuvang chuan Bible-in engtin nge a sawi ti zela nitina kan thil hriat leh tawn, pawm nuam kan tih leh awih mai sam te hi thlir a, chik tur kan ni. Kan thupui hi Bible enin i lo thlir ve teng aw.
Bible khawi lai mahah hian ringtu, thlarau sualin a man (ramhuai pai) tih hmuh tur a awm lo. Chanchin Tha leh Lehkhathawn ah te ringtu tu hnenah mah, “Ramhuai a pai loh nan fim khur rawhse,” tih lam hawia infuihna emaw, zilhna a awm lo. Tuman ringtu chhunga ram huai an phuarin an hnawtchhuak kan hmu bawk hek lo. Lal Isua leh a zirtirten ramhuai an hnawhchhuahna zawng zawng kha kan chik a, kan en nawn leh chet chet chuan ringtute ni lov in, ringlo te chhung atang vek a ni tih kan hmu zawk ang.
Entirnan : II Korinth 6 chuan ringtute hi Pathian Thlarau Thianghlim In (Temple) kan ni a, kan chhunga awm Thlarau Thianghlim leh ramhuai an chen dun theih loh zia lantir nan tihian a ziak: "Beliara leh Krista pawhin engnge inngeihna an neih? A nih loh leh ring lo leh ringtu chuan engnge chan dun an neih? Milemte leh Pathian biak in pawhin engnge inremna an neih? Keini zawng Pathian nung biak in kan ni si; Pathianin, 'Anmahniah ka awm ang a, Anmahniah ka leng bawk ang; Tin, an Pathian ka ni ang a, Anni pawh ka mite an ni ang,' a nih ang khan."(chang 15-16). Kolossa 1:13; chuan, "Ani chuan thim thuneihna laka min chhan chhuakin, a Fapa hmangaih taka ramah chuan min kaitir ta a;”... tiin kan hmu bawk.
Hei hian ringtu chu Pathian lal rama awm a nih tawh avangin Setana meuh paw’n a chhuhsak thei lo tih min zirtir a. Rom 8:37; chuan, ",...ropui taka ngam tu kan ni!" a ti bawk. I Korinth 15:57; ah, “Krista zarah hnehna changtu kan ni” a ti a. I Johana 2:13; chuan, “,... mi sual (dibola) ngamtu kan ni” a ti. 4:4; ah pawh “,...kan chhunga awm Thlarau Thianghlim chu a chak zawk avangin a ngam vek thu min hrilh. Heng Pathian thutak zirtirna zawng zawng en hian eng vanga ‘Ringtute chhunga ramhuai lut thei zirtirna’ tih vel hi pawm thei ta mai nge kan nih le? Bible a daw ve ngai bawk si lo. A nih chuan ringtu ni awma kan ngaihte chhunga thlarau sual lut nia kan hriatte hi ringtu dik ni loin a suak leh sakhaw mi tha an ni mai zawk lo maw?
Bible chuan kan thupui chhanna chu ‘Aih’ a ti a. Bible zirtirna hi tehfunga hmangtu zawng zawng tan chuan kan thupui chhanna chu Bible zuiin ‘Aih, lut thei lo e,” tih hi a ni e.##
0 comments:
Post a Comment