PATHIAN THU: CHHIAR LA, HMANGAIH LA, ZAWM RAWH:
(Love! Read! Practice God’s Word!)
-Dr. Robert G. Lee
Hmui themthiam berin Bible a fakmawina te, thu thiam ber berten an pen hmanga Bible fakmawina thu an phuah chhuahte chu Lalpa pangpar huan mawi tak cheibawl nana buar leh hling lo vawm khawm ve ang a ni. Kan thiam tawpa kan fakna pawh Bible tihhmelhemna chauh a ni. Pathian nung aṭanga chhuak Thu nung a ni a, a awm ṭanna chu mihring hriat phak loh a ni a, a huam chin chatuan thlengin, a hlutna sawi phak loh khawpa hlu, a huhang teh rual loh, a tum zauzia tawp chin nei lo, a tichhuaktu Pathian, a ziakna hmanrua erawh mihring, a thiltihtheihna kang thei lo, a thuneihna dik lo thei lo, mi zawng zawng leh thil zawng zawng huap, mi mala hman ṭangkai chi, a pum puia Thlarau Thawk khum a ni.
Tunlai pawhin miin tihtakzeta a chhiara, ro hlu ber anga a ngaihna hmun apiangah bawih nihna nghawngkawl a tihtliahsak a, nun tihrehawmtu a lak kiansak ṭhin. Thihna tur a sutkiansak a, a na pawh a tihdamsak. Hmanlai hun ata thlan piah lama chatuan ram eng mawia luhna kawngka, mi tam tak tan a lo sah hawnsak tawh a ni.
Chu chang a ni lo, hmanlai aṭangin martar tam takten an thlansa tihdaih nan leh intihharh nan a chhunga tuihna kang chat ngai reng reng lo hi an hmang ṭhin a. Mithianghlim chhiar sen loh Lalpaa muhil tawhte chuan he Lehkhabu thianghlim hi an lu nghah nan lukhamah an lo hmang a, thihna lui daikai mekte tan hei aia lukham nem leh nuam hi a awm si lo va.
Kan chhungkaw Bible, hun rei tak aṭang tawha harsatna leh inchhirna mittuiin a chei ran buai tawh chu ka hre reng ṭhin; he Lehkhabu hi thlarau lam indona hmunah ka hmanraw hlu tak a nih ṭhin avangin ka ngaina lehzual a. Min thlahtuten zah taka an lo keu va, an lo chhiar ṭhin kan chhungkaw Bible han chhiar hi nuam ka ti a, vanram Lehkhabuah an hming a chuang ngei a ni tih an hriat chian theihna tura mite a ṭanpui ṭhin avangin he Lehkhabu hi ka ngaisangin ka ngaihlu em em a ni.
Kan chhungkaw Bible-a thu hlu tak tak han hriat chhuah leh ṭhin te hi nuam ka ti a, nunna tuipui chunga ka len laia thlipui kara min chelh dingtu thirchakai a nih ṭhinziate ka ngaihtuah fo ṭhin. He Lehkhabu sawichhetu leh hmusittutena an sawichhiatna zawng zawng pawhin a tihmelhem thei chuang lo hi ka ngainat zualna a ni.
He Lehkhabu mak tak mai hi,"..a nung a, chatuan thlengin a awm reng ang”tih “Pathian Thu”kha ziak a la ni a. Hmanlai aṭanga tunlai thlengin tihboral tumtu a hmelma tam takten a thianghlimna mei siper khat te pawh an lo hmet mit thei lo va, a thlumna far khat pawh an la tidal lo va, a tah hmang mawi tak hi kaw khat lek pawhin an la tipawp thei lo. A zai sang tam tak zinga pakhat lek pawh an tichat thei lo va, a nunna marphu an tichawl thei hek lo; hneh chung zela a kalnaah pen khat lek pawh an titawp thei si lo va.
Tunlaiin he Bible hian kawngpui leh kawng peng a zawh tam tulh tulh a, mi kawngkhar a kik hawng tam tual tual a, lehkhabu dang zawng zawng aiin mite hnenah anmahni ṭawng ngeiin thu a sawi tam tulh tulh a ni.
Chhiar a, ngaihven tur a ni!
Chaw hi chik takin endik ila, ei si lo ila, taksa tan ṭhatna a pe thei dawn em ni? Tui in ova a ena en ringawtin tuihal a tireh thei em? Kawr pawh hi ha lovin a sawiin sawi ho ta mai mai ila, taksa a tilum dawn em ni? Meipui pawh a bula kala kan ai si lohva, ralkhat aṭanga a thla kan lak ringawtin lumna min pe thei dawn em ni? Kalkawng peng hi ralkhatah thlir ringawt ila, kan kal ngei si loh chuan khawi mah min thlen thei lo vang.
Miin Bible hi a chhiar a, a zir a, a thinlunga a khawl khawma, a ngaihtuah loh cuan malsawmna a pe thei lo vang. Hei hi ka sawmna leh ngenna a ni. Chhungkaw Bible ngaina lehzual turin taima lehzuala chhiar ṭhin turin, ngaihthlak peih turin, a thutakte hi nitin nuna hmang nghal thei tura Pathian hnena dil ṭhin turin.
(Gospel Puangtu, August, 1996)
0 comments:
Post a Comment