Kutpui hmang dawn

Welcome To JEDIDVENA

JEDIDIA Zan Tawngtaite

Welcome To JEDIDVENA

JEDIDIA Zan Tawngtaite

Welcome To JEDIDVENA

Webfree Browser

Welcome To JEDIDVENA

Aboutme

Welcome To JEDIDVENA

Friday, December 2, 2011

THLARAU THIANGHLIM THILTIHTHEIHNA (The Power of the Holy Spirit)

THLARAU THIANGHLIM THILTIHTHEIHNA
(The Power of the Holy Spirit)
- A.W. Tozer
              “Thlarau Thianghlim chu in chunga a lo thlen hunah thiltihtheihna in la nei ang.”(T.T. 1:8;)
          “Thiltihtheihna in la nei ang!” He thu a hrilh hian kan Lalpa chuan a zirtirte heah beiseina sang tak a siamsak  a; anmahnia chhuak ni lo, van lam thiltihtheihna chak takin anmahni a chenchilh tawh dawn a, chu chu nghakhlel takin an thlir tur a ni tih a zirtir bawk a ni. Chu thiltihtheihna chu tun hmaa an la hriat ngai loh thiltihtheihna a ni a; thawklehkhatah van lam aṭangin an chungah a lo thleng thut dawn. Anmahniah Pthian a lo lut a ni ti ila, chu aiin a nep chuang lo vang.

       “Thiltihtheihna in la nei ang!” He thiltihtheihna hi mihring khawvel  piah lama mi, thlarau khawvel chakna leh thiltihtheihna hi mihring nun kil tinreng luahkhata, luhchhuak vek thei leh kumkhuaa amah chenchilh reng tur thiltihtheihna a ni. Hmuh theih leh khawih theih thiltihtheihna a ni lo va, mihring chhung lam ngaihtuah aṭanga chhuak chakna a ni hek lo. Thlarau lam thiltihtheihna a nizaawk. chu chan Kristiante thinlungah leh Kohhrana Thlarau Thianghlim hnathawh mak tak mai hi a tichiang a. Mihring nuna thlarau lam thil fiah taka lanchiantir theihna thiltihtheihna a ni. Mihring finna leh ngaihtuahnain a thlen theih baka hla leh sang daih thlenga rilru chawikang thei, thil awmze ril zawk chhui chhuak zung zung thei thiltihtheihna a ni.

      Thlarau Thianghlim hnathawha a thupui ber chu hlimthla mai ni lo, a tak tak hailan leh hriattir a ni a – he leia thil awm leh vana thil awm te, a hlimthla mai ni lo, a tak tak hriattir te hi. Krista nena inpawlna duhawm tak miin  a neiha, a thil tawn(experience)  ṭhin pawh thu maia a dawn ṭhin kha a tak taka chan theih ni se tih hi a ni. Krista chu minung tak tak a ni tih hriatchianna leh hnai teah, khawih theih si loh, chiang tak siin a awm a ni tih hriatna. Tichuan, thlarau lam thil dang reng reng pawh rilruah fiah takin a lo lang a, khawngaihna te, ngaihdamna te, tihthianghlimna te chu kan hmaa lehkhabu inkeu reng ang tluk thawthanga chiangin a lo lang thei. Ṭawngṭaite pawh awmze nei lova phun mai mai a ni tawh lo va, kan kianga tu emaw awm ngei hnena thusawia, amah nena inkawmna a lo chang a. Pathian kan hmangaihna leh a fate kan hmangaihna pawh thu mai, awmze nei lem lo ni tawh lovin, nun luahkhattu pawimawh tak a lo ni a. Thlarau lam leh vanramte pawh kan nunah a chiang tulh tulh a; chutih rual chuang he lei leh khawvel thil te chu a chuai tulh tulh ve thung a, hlimthlaah a chang tial tial thung.

            Tinungtu chu Thlarau a ni

        Tunlai hunah Pathian Kohhrante’n thil dang zawng zang aia kan mamawh lian ber chu Thlarau Thianghlim thiltihtheihna a ni tih hi a rinhlelhawm lohvin ka hria. Thiama sang zawk te, zirna ṭha zawk te, Kohhran inawp dan leh enkawl dan fel fai tha zawk te, hmanraw changkang zawk te, tih dan tunlai leh hmasawn zawkte chu engahmah chhawrbawkna a awm chuang lo. Damlo a thih tawh hnua Oxygen pek tum ang a ni. A hun taka Tinungtu chu “Thlarau”a ni.

     Thawhhona ṭha hmanga hneh kan tum chhung chuan kawng dik lo kan zawh tihna a ni. Thawhhona ṭha leh inzawmkhawm hi kan maawh lian ber a ni lo, kan mamawh ropui ber mai chu thiltihtheiha a ni. Ka rawtna hian mi ngaihven a hlawh tehchiam loh ka ring; mahse, hei hi ka rawtna chu a ni- Keini Bible ring Kristiante hian sakhaw thila kan hmachhawp, kan hna buaipui zawng zawng hi chawlhsan vek a nih tur thu puang ila, chung lam aṭanga Thlarau Thianghlim a  lo thlen theihna tura kan inbuatsaih nan kan chhungkaw thil I rel fel ang u. Kristian kalkhawm Kohhranho hi kan tisa lutuk a, kan inkhawmnaahte lah Pathian zahna a awm si lo, mi tam berin sakhuana kan hmuh dan leh kan ngaih dan pawh a tla hniam lututk ta; chuvangin, tun hun anga thlarau chakna leh thiltitheihna kan mamawh hi hun dangah a awm ngai kher lo vang. Mahni inenfiahna hun hi siam ila kan hlawkpui ngawtin ka ring; chumi chhung chuan mi tinin mahni thinlung ṭheuh ngun taka en chhuakin, nun thianghlim leh rawngbawlna rah ṭhaa rah chhuak thei a neih theihna tura Thlarau Thianghlim baptisma a chan theihna turin inbuatsaih sela.

Thil pakhat chiang taka sawi theih chu, tunlaia harsatna kan tawh chungchangah hian van lam aṭanga min rawn tlawh harhna leh van lam thiltihtheihnain min luahkhah chauh lo chu, tihdamna dang a awm lo tih hi a ni. Kan dik lohna min hriattir a, min hmin theitu chu Thlarau Thianghlim chauh a ni a, a tihdamna min khawhhmuh theitu pawh Thlarau Thianghlim chauh bawk a ni. Thlarau Thianghlim nei lo, chawmawlhna laka min chhan chhuak thei chu Pathian Thlarau chauh a ni.

Thlarau Thianghlim – Mei anga Inlar

“Tin, lei te, amaha insem darhin, mei angin an hnenah a lo inlar ta a. Tin, an chungah a chuang ṭheuh va”(T.T. 2:3). “Chutiang bawkin, Pathia thute chu Pathian Thlarau vek lo chuan tu ma’n an hre lo.”( I Kor. 2:11).
Pathianin a nihna dik tak mihringte hnenah a hrilh hriat theih loh avangin, a anpui hmangin kan hnenah a sawi ṭhin. A nihna mihringte hriat phak loh puanzarna atan thil chi hrang hrang a hmang ṭhin a, chung zinga pakhat chu Mei a ni “Kan Pathian chu mi kanral hmang mei a ni”(Heb.12:29). Thingbuk alh aṭangin Mosia hnenah thu a sawi a; Israel fate thlalera an zin chhung zawng khan mei  alh angin a hruai ṭhin. Zawlnei Ezekiela hnena a inlar pawh khan mei angin a lang, “Tin, a kawng a chin chung lam chu ṭhi hna puak sur ang maiin ka hmu a, a kawng niawm hnuai lam chu mei ang mai hi niin ka hmu a, a eng vel pup mai a. Ruah sur nia chhum chunga chhimbal lan dan ang mai hi a vela pup mai a. Ruah sur nia chhum chunga chhimbal lan dan ang mai hi a vela eng lan dan chu a ni a. Hei hi Lalpa ropuina lan dan agn chu a ni. Tin, ka hmuhin bawkkhupin ka tlu a, thusawitu aw chu ka hria a.”(Eze. 1:27,28;).

            Mihirng a tlan chhuahte hnenah Amah a inpe

     Pentikost nia Thlarau Thianghlim a lo thlen khan, Thuthlung Hlui huna a inhriattir ang bawkin mei angin a lo lang leh a. Pindan chungnunga zirtirte hnena lo thleng kha thil dang  ni lovin, Amah Pathian ngei a ni. thi thei mihringte mita a lan danin mei ang mai a ni a. Pawn lam aṭanga lo kalin anmahni chhungah a luhchilh a. Tun hma, an pi leh ute hun laia zahngaihna lalṭhutphah chunga sekaina eng awm ṭhin kha tunah  chuan ringtute lu chungah a lo awm ta; nun danglam an nei tih chhinchiah a ni. Hei hian Amah Pathian ngei chu a tlanchhuah mihringte hnenah lo kalin, amah leh amah a inpe tih a tilang. Lei anga lang, mei alh chu Pathian leh amah ringtute inpumkhatna chhinchhiahtu a ni. Tunah chuan Isua zuitu hmeichhia leh mipa zawng zangte chu mei alha piang an lo ni ta. Hei hian Thuthlung Thar thuchah bulpui a fun khawm – Isua tlanna thisen avangin misualte chu Pathian nen pum khata siamin an lo awm ta a ni.

     Pathian mihringah a cheng! Hei hi Kristiante chu a ni; mii hei hi a taka a nunin a chan hma loh chuan Kristiante thurin thiltihtheihna hi a la hre lo tihna a ni. Thil dang zang zawng hi chu a hma theh chauh a ni. pathian mihringa lo channa, tlanna, thiamchantirna, siamtharlehna – heng zawng zawng te hi mihring nuna Pathian a lo chen theihna tur a buatsaihna hna, Pathianin a thawhte an ni. Sual avanga Pathian thinlung chhuahsantu mihring chuan tlanna hnathawh avangin a chhuahsan tak Pathian thinlungah a kir leh a; sual avanga mihringte thinlung chhuahsantu  Pathian pawh, tunah chuan mihring thinlungah, a hmelma zawng zang umchhuaka, ropui taka chenchilh leh turin a lut leh ta bawk a.

      Pentikost nia hmuh theiha mei alh ang lo lang khan Kohhran tan awmze ril tak ne, an lu chunga mei alh a fukna apiangte chu serh hran, mei aṭanga piang chhuak  an ni si a. Mei chu van lam chhuak chhinchhiahna a nei a; chumi dawngtu apiangte chu kumkhuan mi danglam bik, chi thlan, lal puithiam ho hnam thianghlim, Pathian mite, mei alh aṭanga chhuak fanu leh fapate an ni.

     Thlarau Thianghlima khat nun hi Kristiante nihna sang danglam bik, duhsak bik tlem tein an chan chauh tur a ni lo. Khawvel pumpuia Kristian zawng zawngte nun dan phung pangngai tur a ni zawk. Hei hi, “Mi zawng zawng laka a lo thup kumkhua ṭhin, ama mite hnena a puan tak thuruk kha…tuna a mithianghlimte hnea lantira awm(Kol. 1:26).




(Gospel Puantu, March 1995)

Thursday, December 1, 2011

MAMAWH HUNA TALHTUM LEH TIANG

MAMAWH HUNA TALHTUM LEH TIANG
(Rod and Staff In tiame of need)
-J.R. Miller

          Thlarau lama thutakte hi a hmanna tur hmuna kan awm chauhvin a hman ṭangkai theih a, kan nun  kawng chhukchhovah, a bik taka mamawhna hmun leh hun kan tawng a nih ngawt loh chuan Pathian thutiam tam tak, Bible-a kan hmuhte hi kan hmang ṭangkai ngawt thei lo.

        Entir nan, Pathian thutiam pakhat – “Mangan ni chuan a buk teah mi dah ru dawn si a,”(Sam. 27:5) tih kan hmu a. He thutiam ropui tak hi naupangte, a inkhuallemna khala lungawi taka awm melh melh tan engmah awmzia a awm hranpa lo; nula leh tlangval, hlim taka lui kama leng duna, engmah harsatna nei lem lote tan pawh awmzia a nei hek lo. Mi mangang leh harsatna khur thuk taka tlu lut mekte tan erawh chuan awmze nei ta, hriatthiam awl tak a ni thung.

       He thu pawh hi han ngaihtuah the. “Ka khawngaihna I tan a tawk e”(IIKor. 12:9). Hei hi harsatna, eng lai pawha delh rengtu tibo thei tura Paula ṭawngṭaina a ni a. Mihringte harsatna, mahnia lak kian mai theih loh tihkiansak tura Pathian thiltihtheihna dila ṭawngṭaina a ni. Chutiang thil mamawhtute tan lo chuan hriatthiam mai thei a ni lo.

        Kristian piangthar hlim, la naupang tak leh hlim thei em em mai hnenah Krista chuan hetiang deuh hian a sawi :”Thu hlu leh duhawm tak, Pathian hmangaihna mawi taka eng chhuak phat mai pek tur che ka nei a; nimahsela, tunah chuan I la tlin rih lo vang,”tiin. Chu tlangval chu hlim takin a nung chho zel a; amaherawhchu, zawi zawiin harsatna leh buaina chhumpuiin a rawn chhim pil ta mai a. Isua chu a hnenah a lo kal leh a, a hnenah,mana ka pek duh rih loh che thu hlu tak kha tunah ka pe tawh che; ka khawngaihna I tan a tawk e.”tiina thlamuan a. A hmaa hriatthiam loh thutiam hlu tak mai chudinhmun harsaa a han din meuh chuan a tan a hlu em em a, thu naran mai nia lang kha tunah chuan lunghlu ṭha mi ai pawhin a hlu tawh zawk a ni.

        Bible thu tam tak hi a dawnna tur hmun dik taka kan awm hun chauhva dawn theih a ni a. Kan chak loh lai atana thutiam, chak taka kan awm laia kan dawnsawn thiam hauh lohte a awm a. Hmun hlauhawma awmte tana thutiam; hmun ralmuanga kan awma venhimna kan mamawh loh laia kan hrit theih loh te; hrisel ṭha taka kan awm laia kan mamawh  loh, dam lo leh hrisel lote tana thutiam te; mahni chauhva khawhar taka kan awm lai atana thutiam, kan ṭhian  duh takte nen hlim taka kan awm laia kan hriatthiam loh te; upa leh tarte tana thlamuanna thutiam, kan vanglai hun atana awmze nei lem lo te a awm bawk.

Zan thimnah Pathian arsi min pe ṭhin

Vanlaizawla Ni a en lai chuan Pathianin arsi tam tak awmte chu min hmuhtir ngai lo. Kan vanglai hun leh kan nun chu chak taka chhuna a len lai chuan kan nunin zan thim a paltlang hun atana a hmangaihna thuchah tam takte chu Pathianin min hriattir thei lo a ni. Kristan kan hnenah, "In hnenah thu tam tak sawi tur ka la nei cheu va; nimahsela, tunah zawng in tlin rih lo vang.”(Joh. 16:12) min ti ṭhin. Sawi mah se kan hrethiam thei chuang lo.

        Nimahsela, zawi zawia kan nunin hun harsa a paltlang laiin lungngaihna te, chak lohna te, hlawhchhamna te, khawharna te, damlohna leh tar chak lohnate kan paltlang hunah hengte hi min la hrilh anga, kan thinlung tidamtu leh tihlimtu a ni mai dawn a ni. Zan a lo thlen hunah zawng arsi min hmuhtir ngei dawn si a.

       Chutichuan, kan damchhung nimin hmuhtir ngei dawn si a. Krista thute chuan awmzia a nei tulh tulin, kan tan a fiah tulh tulh dawn; naupan laia ngaihtuah hauh lova kan sawi nawn mai mai ṭhinte kha Amaha kan tlukluhna leh kan rinna puanchhuahna a lo ni zel dawn a ni.

        Naupang tein a hriatthiam loh Pathian thu a lo vawna, a thinlunga a lo khawl khawm ṭhinte kha ṭangkaina nei lo angin lang rih mahse, a nunah awmzia nei lem lo angin lang mahse, engtikah emaw chuan ṭangkai hun a nei ngei dawn. Engtik niah emaw chuan harsatnain a chim anga, a khawvel a lo thim anga, chutih huna chuan heng a thuvawnte hian Pthian hmangaihna eng duhawm tak angin a nun a chhun eng ang a, lungngaihna zan thimah van lam thlamuanna eng mawi takin a rawn chhung eng dawn a ni.

(Gospel Puangtu, August, 1996)

PATHIAN THU: CHHIAR LA, HMANGAIH LA, ZAWM RAWH

PATHIAN THU: CHHIAR LA, HMANGAIH LA, ZAWM RAWH:
(Love! Read! Practice Gods Word!)
-Dr. Robert G. Lee

          Hmui themthiam berin Bible a fakmawina te, thu thiam ber berten an pen hmanga Bible fakmawina thu an phuah chhuahte chu Lalpa pangpar huan mawi tak cheibawl nana buar leh hling lo vawm khawm ve ang a ni. Kan thiam tawpa kan fakna pawh Bible tihhmelhemna chauh a ni. Pathian nung aanga chhuak Thu nung a ni a,  a awm anna chu mihring hriat phak loh a ni a, a huam chin chatuan thlengin, a hlutna sawi phak loh khawpa hlu, a huhang teh rual loh, a tum zauzia tawp chin nei lo, a tichhuaktu Pathian, a ziakna hmanrua erawh mihring, a thiltihtheihna kang thei lo, a thuneihna dik lo thei lo, mi zawng zawng leh thil zawng zawng huap, mi mala hman angkai chi, a pum puia Thlarau Thawk khum a ni.

            Tunlai pawhin miin tihtakzeta a chhiara, ro hlu ber anga a ngaihna hmun apiangah bawih nihna nghawngkawl a tihtliahsak a, nun tihrehawmtu a lak kiansak hin. Thihna tur a sutkiansak a, a na pawh a tihdamsak. Hmanlai hun ata thlan piah lama chatuan ram eng mawia luhna kawngka, mi tam tak tan a lo sah hawnsak tawh a ni.

          Chu chang a ni lo, hmanlai aangin martar tam takten an thlansa tihdaih nan leh intihharh nan a chhunga tuihna kang chat ngai reng reng lo hi an hmang hin a. Mithianghlim chhiar sen loh Lalpaa muhil tawhte chuan he Lehkhabu thianghlim hi an lu nghah nan lukhamah an lo hmang a, thihna lui daikai mekte tan hei aia lukham nem leh nuam hi a awm si lo va.

         Kan chhungkaw Bible, hun rei tak aang tawha harsatna leh inchhirna mittuiin a chei ran buai tawh chu ka hre reng hin; he Lehkhabu hi thlarau lam indona hmunah ka hmanraw hlu tak a nih hin avangin ka ngaina lehzual a. Min thlahtuten zah taka an lo keu va, an lo chhiar hin kan chhungkaw Bible han chhiar hi nuam ka ti a, vanram Lehkhabuah an hming a chuang ngei a ni tih an hriat chian theihna tura mite a anpui hin avangin he Lehkhabu hi ka ngaisangin ka ngaihlu em em a ni.

                Kan chhungkaw Bible-a thu hlu tak tak han hriat chhuah leh hin te hi nuam ka ti a, nunna tuipui chunga ka len laia thlipui kara min chelh dingtu thirchakai a nih hinziate ka ngaihtuah fo hin. He Lehkhabu sawichhetu leh hmusittutena an sawichhiatna zawng zawng pawhin a tihmelhem thei chuang lo hi ka ngainat zualna a ni.

         He Lehkhabu mak tak mai hi,"..a nung a, chatuan thlengin a awm reng angtih Pathian Thukha ziak a la ni a. Hmanlai aanga tunlai thlengin tihboral tumtu a hmelma tam takten a thianghlimna mei siper khat te pawh an lo hmet mit thei lo va, a thlumna far khat pawh an la tidal lo va, a tah hmang mawi tak hi kaw khat lek pawhin an la tipawp thei lo. A zai sang tam tak zinga pakhat lek pawh an tichat thei lo va, a nunna marphu an tichawl thei hek lo; hneh chung zela a kalnaah pen khat lek pawh an titawp thei si lo va.

Tunlaiin he Bible hian kawngpui leh kawng peng a zawh tam tulh tulh a, mi kawngkhar a kik hawng tam tual tual a, lehkhabu dang zawng zawng aiin mite hnenah anmahni awng ngeiin thu a sawi tam tulh tulh a ni.

Chhiar a, ngaihven tur a ni!

            Chaw hi chik takin endik ila, ei si lo ila, taksa tan hatna a pe thei dawn em ni? Tui in ova a ena en ringawtin tuihal a tireh thei em? Kawr pawh hi ha lovin a sawiin sawi ho ta mai mai ila, taksa a tilum dawn em ni? Meipui pawh a bula kala kan ai si lohva, ralkhat aanga a thla kan lak ringawtin lumna min pe thei dawn em ni? Kalkawng peng hi ralkhatah thlir ringawt ila, kan kal ngei si loh chuan khawi mah min thlen thei lo vang.

Miin Bible hi a chhiar a, a zir a, a thinlunga a khawl khawma, a ngaihtuah loh cuan malsawmna a pe thei lo vang. Hei hi ka sawmna leh ngenna a ni. Chhungkaw Bible ngaina lehzual turin taima lehzuala chhiar hin turin, ngaihthlak peih turin, a thutakte hi nitin nuna hmang nghal thei tura Pathian hnena dil hin turin.




(Gospel Puangtu, August, 1996)

ṬAWNGṬAI THLAHTHLAM



ṬAWNGṬAI THLAHTHLAM NUN-SUAL RAPTHLAK 
(Prayerlessness is a Horrible sin)


   -John R. Rice

            Sual bawlhhlawh pui pui khawvela thleng ṭhinte zingah hian, ṭawngṭai thlahthlamnain a thalṭhuam loh pakhat mah a awm lo va, tihtakzeta ṭawngṭainaa dan theih loh tur pakhat mah a awm bawk hek lo. Tualthah te, uirena te leh anchhe inlawhna te ai pawhin he ṭawngṭai thlahthlamna hi sual bawlhhlawh a ni thuk zawk tih hi rinhlelh tur a awm lo. A chiang em em zawk a ni. Tih tak em ah chuan heng –tualthahna te, uirena te, anchhelawhna te hi chu tisa mite rilru la putu tan chuan, indanchep luattuk vanga inven hman loh ṭumte awm palh thei a ni a. Ṭawngṭai thlahthlamna erawh hi chu a laimu tak kha a ni tlat mai a; chuvangin, Pathian nena inmihranna chiang bang a ni ringawt mai.

          Unaute u, kan thil tihsual lian ber mai chu kan ṭawngṭai thlahthlamna hi a lo ni. Kan tlin lohna bulpui ber pawh kan ṭawngṭai lohna bawk. Ṭawngṭai thlahthlamna sual hi a va rapthlak em!

Kohhran an nun lohna leh an bawrhsawm ṭhinna chhan pawh an ṭawngṭai tlem luat vang a ni a. Thuhriltute an ro em em ṭhinna chhan leh rah eng mah an chhuah ṭhin lohna chhan pawh an ṭawngṭai tlem vang bawk a ni a. Ngaithlatute lah chuti bawk! Tihtakzet ṭawngṭaina tam tawk hlan ṭhin ilachuan kan sualna tinreng te leh tlakchhamna tinrengte pumpelh theihna Pathian hnen ata kan dawng tawh ngei tur a ni.

            Mahni nawmsakna tur lam thlira thil kan dilin kan ṭawngṭai ṭhinte hi sual a ni(Jakoba. 4:3;). Rinna nen lova ṭawngṭai pawh sual a ni. Chhungkaw nun dik loh vangin emaw, pawi khawih  sual chul dam leh si loh kawl tlat te leh ngaihdam theih loh neih tlat te, Bible chhiar tui theihna neih hauh loh vang te leh sual lam ngainat ruk tlat vang tea ṭawngṭai kan tui loh phaha, thlahthlam phah nana kan hman ṭhin te hi sual lian tak a ni a, a pawi em em a ni.

            Ṭawngṭaina thlahthlam ṭhak mai tak tak phei hi chu, heng zawng zawng aia sual chung chuang bik a la ni ta fo!

           Ṭawngṭai dan dik lova kan ṭawngṭai ṭhinte ai pawha pawi ber mai leh sual lian ber mai chu, kan ṭawngṭai ngai lo hrim hrim te, kan ṭawngṭai mumal ṭhin lo emaw te hi a ni zawk. Chham dan bik eng emaw takte hi kan nei mai duh hle a. Chutiang chu, Buddhist-ho ṭawngṭaiin thir belval lian pui an khawih vir ṭhin te leh Roman unaute’n Ave Marin an chham leh ngawt ṭhin te nen a danglam chuang lo.

            Eng thil emaw dilin Pathian hnena kan ṭawngṭai dawn ṭum chuan, chhuan chham tawh nutlingin buhfai dawr a pan vang vang ang mai hian, eng emaw chham kual lovin, Pathian chu kan pawh ve nghal rawk mai ṭhin tur a ni a. Mahse, Kristian tam berte chuan chutiang taka tum ruhna nen, hlawhtlin ngei tuma tihtak zeta beih tur a ni tih pawh an hre lo va, an ti ngai bawk hek lo. Tihtakzeta ṭawngṭaina an tlakchham ṭhin vangin, an nunin rah a chhuah lo va, thil a ti thei lo va, nun hlimna thuruk an chang pha bawk hek lo. Zirtirte khan Isua hnenah, Lalpa, ṭawngṭai min zirtir rawh.an ti a(Luk. 11:1;).”

“Ṭawngṭai dan tur min zirtir rawh,” an ti lo va, “Ṭawngṭai min zirtir rawh,” an ti zawk a ni. (Mizo ṭawngah chuan, “Ṭawngṭai dan min zirtir rawh,”tiin lehlin a ni a. He sermon sawitu, John R. Rice-a lehlin duh dan nen chuan a thuhmun chiah lo deuh a ni mai thei. Ed. ) Ṭawngṭai kan zir a ṭul a ni. Pthian mite hian, an ṭawngṭai thlahthlamna sual hi bansanin tihtakzeta Pathian hmaa kun hi zir sela, ching sela, a va ropui dawn em!

Ṭawngṭai thlahthlamna hi sual a nih zia

          Pakhatna- Pathian thuin chuiang takin sual a nih thu a sawi a ni. I Sam. 12:23-ah chuan, “…In tana ṭawngṭai bana, LALPA chunga sual chu keia tan chuan, a hnai lo tawp mai.”  tih thu kan hmu a. Hei hi Samuela thinlungah Thlarau Thianghlimin a rawn thun a ni a, ṭawngṭai bansan chu sual a nih thu chiang takin a sawi a ni. Pahnihna – Kristiante ṭawngṭai tura thupekna Pathian thuah kan hmu tam em em a.

            Ṭawngṭai tur tih satliah mai ni lovin, englai pawha, bang lova ṭawngṭai tur, tihte a ni nghe nghe. I Thes. 5:17-ah pawh,Bang lovin ṭawngṭai ula,” tih kan hmu a. He thu hian, ama lam hawi thu zawmpui engmah a nei lo va, sawi fiah tumna a awm bawk hek lo. Amah lawng lawngin, ngialngan takin a ding tawp mai a ni.
Luka 18:1-ah khan, “Bedawng lovin ṭawngṭai fo tur a ni tih hriattirna turin an hnenah tehkhin thu a sawi a. tih Isua sawi kan hmu leh a. Hei hi, ṭawngṭaia dil luih tlat tur a ni tih Isua min hrilhna a ni a, chu thupek zawm loh chu sual a ni.

Kristiante chu, Pathian ralthuam famkima inthuam tura thu pek an ni a – thu taka kawng hreng turin, felna awmphaw ha turin, remna chanchin ṭha pheikhawk bun turin, rinna phaw la turin, Chhandamna thir lukhumkhum tur leh Thlarau ngunhnam la tura tih an ni a. Tichuan, “..Ṭawngṭaina leh dilna tinrengin, eng hun pawha Thlarauva ṭawngṭaiin, chumi kawngah chuan mi thianghlim zawng zawng tan ṭhahnem ngai tak leh dil tlatin, ngaihven rawh, a ti ta a ni(Eph. 6:18;).

      Harsatna an tawh huna an tlukchhiat mai loh nan inring renga awm turin leh englai pawha ṭawngṭai turin Isuan zirtirte a hrilh ngun em em tih pawh kan hmu(Matt. 26:40,41; Lk. 21:34-36;).

Hetiangin, Kristiante’n ṭawngṭai an thlahthlam tur a nih lohzia Pathianin a sawi a tam em em a; chu thupek zawm loh chu sual a ni lo thei lo. Kan thlahthlam phawt chuan, Pathian chunga helna, thuawihlohna, fa sual nihna a ni a, thil kan tisual der a ni.

Ṭawngṭai thlahthlamna sual hi a kal thuk theih zia I lo en the ang. Thupek kan dawn dan chuan, englai pawha, bang lova ṭawngṭai tur kan ni a. Englai pawha kan ṭawngṭai reng loh chuan, thuawihlohna a ni a, thil sual a ni ta phawt mai a. Rei lo te chhung ṭawngṭai loh pawh sual a ni tho mai a. Kar lak neia ṭawngṭai ṭhin kan nih phawin, hun rei tak chhung ṭawngṭai lohna hun kan belhkhawm chuan, sual nasa tak a tling tawh reng mai a, chutiang chu Kristian tam takte awm dan a ni lehnghal si. Chutiang chu, zu hehna sual emaw, drug ei chingte sualna emaw nen thuhmun a nihna lai a awm a – tih nawn tih nawn, tih zawm zel, chin dawklak chi an nihna laiah an thuhmun a ni.

A nih leh bang lovin tunge ṭawngṭai thei ang? Tih theih rual loh a ni lo maw, kan ti awm e. Tih theih rual loh ti turin Pathianin min phut ngai lo. Pathian thuin thil a sawi chu a sawi tak tak ṭhin; a sawi mai mai ve ngai lo.

Maicham rimtui hal aṭanga rimtui em em chhun zan zawma a khu chuak reng ṭhin angin ṭawngṭaina pawh chhun zan zawmin, englai pawhin thinlung chhungril aṭangin a luangchhuak tur a ni. Kristian nun lairil hian Pathian ngaia tuihalna a nei thuk theiin Ama awmpuina a dawng nasa thei khawp a, a rilrua hre reng chungin emaw, a hriat loh hlan emaw lai pawhin, Pathian duhzawng te ngaichangin leh a hnathawh dan tur kawngte dapin englai pawhin Pthian hmel a thlir reng fo thei ṭhin a ni( Sam. 141:2; I Chron. 16:11;).

Chuvangin, ṭawngṭaina thlahthlam hi sual lian tak a tling a ni. Pathian thupek bawhchhiatna a ni a. Kristian tam takin he dan hi an bawhchhiat avangin retheihna te, beidawnna te, hlim lohnate’n a tlakbuak ṭhin a, sual delhbehin an awm fo ṭhin a. Hrisel taka awm thei turte pawhin an hrisel loh phah a, ṭhenkhat thih phah tawk an awm a. Sumdawnna leh eizawnna kawng dang pawhin a chhiat phah thei a.

Chu bakah, ṭawngṭai thlahthlamnain a nghawng chhuah thil pawi em em mai chu, Pathian tana hnathawhnain a tuar phahin a chauh phah nasa em em ṭhin a ni. II Chron. 7:14-ah Pathian thutiam chiang tak kan hmu a,"…Ka hming pu, ka mite chuan inngaitlawma an ṭawngṭaia, min zawn a, an awm dan sualte an hawi san chuan, van aṭangin ka lo ngaithla ang a, an sualte ka ngaidam ang a, an ram chu ka tidam leh ang.” tiin a sawi a. Hun rei tak chhunga tihtakzeta ṭawngṭai ṭhintu, athian nghak fan fan ṭhintute avanga harhtharna ropui tak tak a thlen  ṭhin thu Bible hmun tam takah kan hmu a ni.

Mahni inserh thianghlima thinlung taka kan ṭawngṭai tak tak ṭhin lohva Pathian thu kan awih ṭhin loh avanga harhtharna thleng thei lo a ni tih hi thudik tak a ni fo. Ṭawngṭaina dik chuan thuawihna leh thiltihtheihnaah min hlang lut ṭhin. Kohhran te an tlakhniam em em ṭhinna chhante, lum deuh pelh pulh, lum chang changa an awm ṭhinte hi ṭawngṭaina tak tak an hlamchhiah ṭhin vang a ni.

Kan ṭawngṭai thlahthlamna hian kan thatchhiatzia a sawi chiang ngawt mai.

Ṭawngṭai hi thil hau tak em em mai a ni a. Rilru tak tak hman a ngai a, ngaihtuah ding theihpatawp a ngai a, tihtakzeta beih fan fan a ngai a ni. Ṭawngṭai mi, mi ropuite chuan ṭawngṭaina daltu apiang an sutlang a, harsatna leh thlemna tinreng an tawn tlang ṭhin a ni. Ṭawngṭaina hun kan vawn ṭhat theih lohna turin buaipui tur kawng dang, pawimawh zet zet min siamsak dan Setana’n a thiam em em a. Ṭawngṭai tuina rilru min tihhnualsak dan te, rinlohna chi rawn phum ruk dan te chein a thiam a. Hetih avang hian, ṭawngṭaina tak tak chu namen lovin a hautak a ni.

Ṭawngṭai kan thlahthlam phawt chuan, Pathian aiin thil dang kan ngaina zawkin, kan ngaihven zawk tih a chiang nghal a. Milem biakna a kawk hial awm e. Ṭawngṭai thlahthlam siin Chanchinbu chhiar te kan tui em em zel mai a. Pathian bula awm aiin khawvel thilte kan tuipui zawk zia a chiang a ni. Pathian nena inkawm aiin midange nena inkawm kan thlang zawk a, thu eng emaw mai mai sawi nuam kan ti em em zawk fo.

            Keini, rawngbawltute pawh han inen ila, ṭawngṭaina hun nei hman lo hial khawpa sermon buatsaihte kan ching a, lehkhabu tinreng kan keu lawr a, Kohhran pawl, organisation lam te kan buaipui em em a, thil pawimawh  ber thlahthlamin, a dawttuah kan inhmang zo leh tlat ṭhin. Isua zirtite’n, “Keini erawh chu, ṭawngṭai leh thu rawngbawlin kan awm leh tlat zel ang,an tihte kha I hre reng the ang. (T.T. 6:4;). Helai thu hi ngun takin en ila, ṭawngṭaina an ngai pawimawh ber a, thusawia rawngbawlnain a dawt tih kan hmu a ni.
Keini, thusawi ve ṭhintute hi chuan, mite chhandamna tur ai mahin, kan sermon sawi dan turte kan buaipuiin kan vei lian zawk fo ṭhin awm e. Pathian mitmei aiin, mihringte mitmei kan veng zawk a, Pathian lo ngaihthlak tur lam aiin, mihringte lo ngaihthlakdan tur lam kan ngai pawimawh a. An thlarau chhanchhuahna  tur aiin, an beng tlaina tur lam kan vei lian zawk a. Hei tak hi, ṭawngṭai kan ngawrh lohna chhan pawh a ni fo. Pathian thiltihtheihna mamawh em ema inhriatna kan neih tlat loh chuan ṭawngṭai ngawrhna chhan tur eng nge awm?


 Ṭawngṭaina tak tak nen o chuan Pathian thiltihtheihna dawn theih a ni lo va. Pathian thiltihtheihna lovin thlarau bo chhanchhuan theih ni bawk hek suh.

Chuvangin, kan ṭawngṭai thlahthlamna hian Pathia duhzawng kan ngaihtuah tak tak lohzia Krista hnena thlarau bote hruai thlen kan tum tak tak loh zia leh Pathian hna dik tak hre tura ngaihvenna kan neih tak tak loh zia a tilang chiang em em a ni.

Ṭhenkhat chuan, “Hna pawimawh tak takte leh thil ṭha tih turte ka ngah em mai a, hna ropui tak leh pawimawh tak an ni vek si a, hetiang em ema ṭawngṭaina bei uar tur chuan, ka hman ngang lo va ni.”  in ti mai thei. Thlemna in tawk a ni tih hria ang che u. Englai pawha ṭawngṭai reng thei kan ni tih hi kan hre tur a ni. “Bang lovin ṭawngṭai rawh,”tih te, “Beidawng lovin an ṭawngṭai zel tur a ni,”tihte hi, Bible-a chuang an ni a. Chumi awmzia chu, hna dang thawk chung pawha ṭawngṭai zel tur tihna a ni.

Chubakah, thil dang zawng zawng dah kiang veka ṭawngṭaina hun bik, Pathian hmaa kunna hun rei tawk tak kan nei ni tin tur a ni, chutiang chu ka hman lo ti ngawt suh. Pathian mi, buai tak takte lehropuitak takte mahin an hmana, an theih chuan, I hman ve loh ngawtna tur chhan engmah a awm lo. Paula lehkhathawn te hi ngun takin bih mah the. Mi dangte tana a ṭawngṭaisak nasat ṭhinzia, ni tina ṭawngṭai vak vak ṭhin mi a nihzia a lang chiang hle a ni.

Lal Isua pawh khan, rei tak tak ṭawngṭai a ching tih kan hmu  a. Tlangah a han lawn a, a han ṭawngṭai ṭhin a. Thlaler hmunah tlaivara ṭawngṭai te pawh a ching a. Gethsemani huna a ṭawngṭai te kha, rei tak ni ngei tur a ni.
Martin Luther-a pawhin, “Pathian tana thawh tur hna ka ngah khawp a, nitin darkar thum tal ka ṭawngṭai loh chuan  ka thawk zo seng ngai reng reng lo.” a ti tlat mai.

Luthera hian ṭawngṭaina a bei nasa em em ṭhin a. A tan chuan ṭawngṭaina chu, insualna, inpawmchilhna, tuarna, thihthaa ṭan lakna hmun a ni ṭhin. Vawikhat pawh, a ṭawngṭai laiin hringhran takin Setana’n a rawn bei ta mai a, hmusit em emin a rawn tihel a, a rawn thlem a, a rawn inrawlh nasa ta lutuk a, Luthera thinurin lehkhatui burin a vawm ta chiam mai a. Bangah te chuan lehkhatui a kai berh ta ngiai nguai mai a. A hnu lam hun kal zela va tlawhtute hnena Luthera ṭawngṭaina hautakzia lo hrilhtu ṭha takah a ṭang ta hlauh nghe nghe a ni.

Thuhriltu, a bik takin evangelist-hote hi, an tan men rei a ṭul ṭhin avangin zing lamah pawh an tho tlai duh deuhva; mahse, D.L.Moody-a chu tuk tin dar 4-ah a tho ziah a, mi thawh hmain darkar khat tal a ṭawngṭai nan leh Bible chhiar nan a hmangṭhin, an ti a. Hudson Taylor-a pawhin zan reh lai takadarkar khat vel Pathian pawl nana hman a ching tlat bawk a. Africa rama a awm laiin, C.T. Studd-a pawh ṭawngṭai turin zing dar 3-ah a tho ngei ngei bawk. Chutiang chu a ni a, Pathian tana thawktu ropui ber berte chu ṭawngṭai nana hun seng nasa ber berte an ni ṭhin tih hi, thudik, chhinchhiahtlak tak a ni.

Keini, kan chhuanlam te hi chhuanlam tling mawlh hek lo. Ṭawngṭaina aia thil dang ngaih pawimawh zawk kan neih vang chauhva ṭawngṭai lo mai kan ni. Ṭawngṭai aiin mut te kan han ngai pawimawh zawk ta tlat ṭhin a. Ṭawngṭai aiin chaw ei te kan dah pawimawh zawk a. Thuhril te pawh ṭawngṭai aiin kan dah pawimawh zawk a. Chutiangin ṭawngṭai kan thlahdah  ṭhinna chhan ber chu thil dang ngaih pawimawh zawk kan neih ṭhin vang a ni.

Ṭawngṭai thlahthlamna sual hneh dan

            Ṭawngṭaina chungchang thil hi ka hre tam lo khawp mai a; mahse, ṭawngṭai thlahthlamna sual hi engtia hneh tur nge, han sawi ve ṭalh ka tum a.

Pakhatna- Ṭawngṭai nan leh Bible chang chhiara Pathian pawlna tur hun bik zing tin ruat phawt tur a ni a. A zing thei ang lam apiang a ṭha a. Eng pawh ni se, tukṭhuan ei hma a ni ngei tur a ni. Missionary pakhat pawhin, ‘Bible chhiar hmasa lo chuan tukṭhuan ei loh tur.”tih  hi thuvawnah a nei tlat a. Heng mite thuvawn aṭang hian keini te ang pumpui hma ngai zawk ṭhinhote kan tisa mi em em zia a lang chiang hle awm e.

Zing  i thawh veleh thil dang engmah i tih hmain rei tawk tak ṭawngṭaina neih ching phawt mai la, chutianga ti tur chuan tuna I thawh ṭhin dan pangngai aia thawh zin deuh a ngai mai thei. “Zing taka mi zawngtute chuan mi hmu angtih a nih kha(Thuf. 8:17;).

Pahnihna- Phurrit, vei bik leh harstna bik Pathian hnena I thlen chu chhanna I hmuh hma loh chu dil luih tlat ching ṭhin ang che. A chang chuan, ni khat thila chhanna famkim dawn loh ṭum a awm thei a; mahse, kan ṭawngṭaina chuan Lalpa hnen a thleng ngei tih hriatna, thinlung taka Amah kan auh vanga A hmel hlim hmuh theihna kan dawng ṭhin a ni.

Mi, chhandamna hmu tura i ṭawngṭaisaka pawh chuan, ṭum khat naah chuan an dawng nghal mai lo thei e. Mahse, ṭawngṭai zawm zel la, I dil angin Lalpa’n a la rawn ti ngei dawn tih hriatna muanawm tak I dawn hma loh chuan bei ang che. A nih loh vek leh kawng dangin Ama remruat dan mil zawnga I dil dan ki I thlak thiam theihna turin Thlarau Thianghlim ṭanpuina I dawn hma loh chu ṭawngṭai ang che.

Chutiang taka I ṭawngṭai ṭhin chuan I thil lungkham leh rilru hahnate chuan a kiansan ang chia, Lalpa kutah engkim I hlan anga, chhawk hahdamna nasa tak I dawng ang.

Pathumna- Ṭawngṭai ṭulna thil a lo thleng veleh ṭawngṭai nghal mai ching ang che. Hun reife kal tawhah khan, keipawh thuhrila ka vah ṭhin laiin ṭawngṭaisak ṭul mi rawn dengtute hi tlai lamah te chuan ka hre reng thei ta ṭhin lo va. Tih dan ka thlak ta a, ṭawngṭaisak ṭul ngeia ka thinlung rawn dengtu chu, ṭhingṭhitpui nghal mai ka ching ta a.

Tin, ka thinglungah Pathian hriattirna chiang tak tak ka dawn ngat loh chuan nakin hnua ṭawngṭaisak zel turin, eng thilah mah ka intiam ngai lo va. Chutianga nakin hnua ṭawngṭai ṭula hriatna a lo thlen veleh Pathian hmaa tlukluh nghal mai ka chin aṭang chuan, thlamuanna ropui tak dawng phah nan ka hmang ta hlauh nghe nghe a. Pathian nen tui taka inpawlna ka chhar phah bawk a, a lawmawm ka tiin manhla ka ti em em ṭhin a ni.

PalinaDan anga neiha tih dan phung pangngai anga tih ṭhin zawng zawng hi bansanin Amah Pathian ngei chu hmachhawnin be mawlh mawlh mai rawh. Ni khat chhung ngawt pawhin, “Lalpa, he pa hnenah hian eng thu nge ka sawi dawn, mi han ṭanpui teh.tiin vwi tam tak Pathian hmaah kan inhlan ṭhin tur a ni. Kan nun ze mawi tinrengte nen ṭawngṭaina hi kan suih zawm ngei tur a ni.

Ṭawngṭaina chungchang lehkhabu ropui tak ziaktu, Hallesby-a chuan,"Mi kan tawh apiangte tan kan ṭawngṭai sak ṭhin tur a ni.”a ti a. Ṭawngṭaia kan chham ṭhin dan pangngai dah kiangin, naupang têin mawl tak maia a nu a be mawlh mawlh ṭhin ang chian hian, I Pa Pathian chu be ve mawlh mawlh mai rawh.

Pangana- Bible-a Pathian mite ṭawngṭai dan hi kan zir ve a ngai a ni. Jakoba chu zankhuain a ṭawngṭai tih kan hmu a. Chutiang bawkin, Isua ngei pawh zankhuain a ṭawngṭai tih kan hmu a. Kei pawh chutiang chu ka ching ve ta a. Dallas khuaa Galili Baptist Church-a kan ṭawngṭai tlaivar ṭhin lai te leh, Minnsota St. Paul YMCA-a zing dar 2  thlenga kan ṭawngṭai tlaivar ṭhin ṭum te, Oswald J. Smith-a hova People’s Church-a zanlai thlenga kan ṭawngṭai ṭumte-a malsawmna ka dawn ropuiziate chu ka theihnghilh thei ngai lo.

Bible-a Pathian  mi ropuite tih dan kan thik peih lo hi thil zahthlak tak niin ka hria. Malsawmna an dawng nasa thei em em ṭhin a. Keini pawhin, I ti ve nei the ang u.

Estheri leh a ṭhuihhruaite chu ni thum leh zan thum chaw ngheiin an ṭawngṭai a. Ninevi mipuite pawh an khawpui zuah tura Pathian hnena an dil hlawhtlin hma loh chu chaw-lo-tui-lovin ni tam an ṭawngṭai tih kan hria a. Pentikos ni thlen hma ni sawm zet chhung chaw ngheia zirtirteho an ṭawngṭai thu kan hmu leh a(Mat. 9:14,15; T.T. 1:13,14-te en la).

Chutianga mi thianghlimte chaw ngheia an ṭawngṭai thu Bible hmun tam takah kan hmu a ni. Ezara leh a ṭhianteho, Davida te, Paula te, Barnaba te, chaw ngheia an ṭawngṭai thu kan hmu a. Nangni, unaute u, Pathian hnen ata Van chawtui ngenin, Ama thiltihtheihna dilin, ni khat tal chaw ngheia ṭawngṭai hun in nei tawh ngai em?

Pharisai-te mahin intih lan mawi tumna mai mai vanga chaw nghei an ching peih a nih chuan Pathian thiltihtheihna dawng tur leh thlarau bote lainatna phurrit vanga chaw ngheia ṭawngṭai chu keini Kristiante hian kan thei lo vang maw? A va mak dawn ve!

Daniela chuan hapta thum zet chhunga sa leh chaw tuihnai mumal engmah a ei loh thu min hrilh a(Dan. 10:2,3;). Chutiang bawkin keini pawh hian harsatna eng emaw tak tal kiansak kan nih hma loh chuan; hnehna eng emaw tal kan hlen chhuah hma loh chuan; malsawmna eng emaw kan dawn hma loh chuan; kar hnih thum pawh chaw tlem chauh eiin, hna tlem chauh thawkin, kan sualnate avanga lungngaia thupha chawi chung zelin, Pathian hmaah kan kun ve ṭhin dawn lo’m ni?

Kampen hlawhtling ber ber ka telna ṭhenkhatah chuan ni tam fe fe chhungin chaw chakna leh mut chaknate ka hluh ta ṭhin a; hnehna khawvar a en hma loh chu ṭawngṭai ṭula hriatna ka nei a. Ka cher phah deuh hial ṭhin a. A tawpah chuan, harhtharna mei a lo alh chhuak a, mi tam takin chhandamna an dawng ta ṭhin a ni.

Chhungkaw ṭhenkhat, an nu berin ṭawngṭai ṭula a hriat tlat vanga chaw ei tur mumal buatsaih mang lova, zan rei fe fe thlenga hun eng emawti chhung ṭawngṭai ṭhinte pawh an awm fo mai.

A chang chuan Bible-a mi ṭhenkhatte  ṭhingṭhiin an ṭawngṭai ṭhin a. Dorki ruang bula Petera a ṭawngṭai ṭum pawh khan mi dangte chhuahtir vekin ṭhingṭhiin a ṭawngṭai a (T.T. 9:40;). Mahse, Petera bawkin Anania te nupa chunga Pathian anchhia a puan chhuah ṭum kha chuan ṭawngṭaina ang tho a ni nain, ding chungin a chham mai bawk a(T.T 5:1-10;). Joshua chuan Amor-ho nena an indo buai lai takn, ni kal lai chu ding rih turin thu a pe tlat mai. Chutiang khawpa ṭawngṭaina huaisen hlan thei rinna chu a va ropui em!(Joshua 10:12-14;).

Kan tihphung I bansan ang u

A changin Isua chu ding chungin a ṭawngṭai ṭhin a. Gethsemani huanah erawh kha chuan bawkkhupin a ṭawngṭai tih kan hmu a(Mat. 26:39). Heng zawng zawng aṭanga thil kan zir chhuah tak pakhat chu, ṭawngṭainaah hian tih dan phung bik engmah a awm chuang lo tih hi a ni. Ding chungin emaw, ṭhu chungin emaw, bawkkhupin emaw, kal chungte pawhin, kan awm dan ang anga ṭawngṭai hi kan zir tur a ni.

Harsatna leh lungngaihna nasa tak kan tawh laite chuan, bawkkhup ngeia ṭawngṭaiin Pathian kan au tur a ni a. Hun dangah te erawh chuan, Davida angin zan laiah te pawh kan tho vanga, thinlung taka Pathian pawlna neih kan ching tur a ni(Sam. 4:4;). Chumi bakah zing, chhun leh tlaiah kan ṭawngṭai leh ṭhin tur a ni (Sam 55: 17;).

Ṭawngṭaina chi hrang hrang Bible-a kan hmuh te hi chin ve ngei tumin bei teh ang. Bible mi te ṭawngṭai zat, an mittui sen zat, an chawnghei zat nghei ve tur te hian inpuahchah ila. Khawvel kan dam chhunga kan hna ropui ber, thil dang zawng zawng aia kan tuina ber, chhum lo chat lova kan tih ṭhin ni mawlh rawhse.

Aw le, tunah chuan ṭawngṭai I lo thlahthlam nasat ṭhin zia I inhmuchhuak tawh ang a, Pathian hnenah thupha chawiin I inhlan nghal dawn lo’m ni?

(He sermon hi Gospel Puangtu March, 1993, kuma chhuak kha a ni e.)


Lalpan malsawmin veng zel che rawhse.